隔晚FOMC（聯邦公開市場委員會）議息，一如預期維持息率不變，聯邦基金利率繼續於5%至5.25%區間，但最新利率點陣圖顯示，官員預測今年底利率中位數為5.6%，高於之前預測嘅5.1%，反映下半年仍有機會加息兩次，每次再加0.25%。如此一來，今年內減息嘅機會大減，其實美國經濟並未如年初預期咁陷入衰退，基本上市場憧憬美國年內減息，預期好大機會落空。
另一方面，中國外交部宣布美國國務卿布林肯於周日及下周一訪華，中美凍封關係解凍，市場憧憬中美緊張關係緩和，有助內地經濟復甦。不過中國5月份嘅零售及固定資產投資數據均差過預期，加上人民幣進一步下滑，限制咗港股早段升幅。
恒指高開218點，升幅一度收窄至142點，之後買盤重現將指數推高，升幅一度擴大至273點，見19681半日高位，成功突破250天線(19564)，不過內地公布經濟數據差過預期後，升幅收窄，喺牛熊線附近爭持。半日恒指升160點，國指升88點，恒科指繼續跑贏，半日升66點。半日成交額525.36億元，咁嘅升幅計，都未見有資金增加入場，但乾升還乾升，有心挾淡倉，只要無乜沽盤擋路，可以更上一層樓。
藍籌股都係科網股最出力，ATMJB全面向上，騰訊(00700)半日升1.3%，阿里(09988)半日升2.6%，京東(09618)半日升2.9%，百度(09888)半日升2.4%，美團(03690)半日更升3.7%。不過金融股表現就麻麻，大笨象(00005)無起跌，友邦(01299)半日逆市跌1.3%，工行(01398)跌0.5%，建行(00939)亦無乜動靜。今日體品股表現突出，申洲(02313)半日升近一成，藍籌之中表現最好，李寧(02331)跟安踏(02020)分別升7.1%及5.8%，其他體品股全線向上，半日升4%至6%不等。
雖然人民幣仍弱勢，但內地首5個月商品房銷售額增8.4%，內房股今日又嚟一嚟，不過以升幅嚟講，只有清盤呈請獲頒令撤銷嘅融創(01918)半日升7%較為突出，其他升幅由1%至4%不等，講真，內房股內傷嚴重，真係升升跌跌都好，阿Man都提唔起興趣。
暫時大市仍然係好友佔盡上風，恒指已先後突破多條移動平均線並企穩，重點係重上250天牛熊分界線，又能企穩嘅話，大市再向上挑戰50天線(19713)及100天線(20177)，咁由1月伸延至上月嘅跌浪，有機會完成並轉勢，大前提係250天線不能再失，一旦又掉頭失守，大市仍然未能擺脫反覆上落格局，繼續有波幅，無升幅，困死喺20000點水平之內。
麥狄文
(徐狄怡‧證監會持牌人)
