美國隔晚公布5月CPI，通脹比預期低，美股三大指數上升，標指跟納指創13個月高位，港股連升五個交易日後，今早高開後有少少腳軟，加上今晚FOMC（聯邦公開市場委員會）議息，缸邊友都抱觀望態度。暫時恒指喺19500水平好淡爭持，呈拉鋸局面。
恒指高開26點，升幅一度擴大至119點，見19641半日高位，可惜唔見資金入場追貨，大市掉頭向下，倒跌60點，見19460半日低位，喺19500邊爭持。恒指半日收報19511，跌9點，暫未能收復250天線(19573)，呢個位阻力都唔細，要上破都有啲難度。國指微升7點，報6626；恒科指升49點，收4101。半日成交額509.15億元，略見增加，重磅股升咗，股價高咗，成交額增加都係好自然嘅事。
藍籌股仍然係由科網股撐住個市，ATMJ仍然錄得升幅，不過半日只有騰訊(00700)升逾1%叫勁啲，美團(03690)、阿里(09988)跟京東(09618)升唔夠1%，有少少強弩之末嘅感覺。至於友邦(01299)跟大笨象(00005)半日分別跌0.6%及0.1%；港交所(00388)日線圖出咗個黃金交叉，畀面都要升一下。不過，內銀股就全線向下，阿爺要下調貸款利率同存款利率谷經濟，可惜有錢無人借，內銀貸存業務都係難撈，內銀股半日普遍下跌，跌幅由0.4%至近2%不等。
內地電訊股今日全線向下，中移動(00941)跌1.1%算係跌得少，聯通(00762)跟中電信(00728)齊齊跌逾3%。餐飲股反彈，早幾日死死吓，今日總算止跌反彈，但亦未返仆落嚟之前嘅水平，以九毛九(09922)為例，唔上返14元樓上企穩，再向下尋底機會仍在。
港股半日挑戰250天線無功而回，有機會短線調整，首個支持位係19400，呢個位係1月份低位，五窮月穿咗呢個前支持位就變阻力，6月份反彈升得穿呢個位，按道理係有機會扭轉弱勢，今日挑戰250天線不果，如果仲要下穿呢個短線支持，大市就有機會反彈完成，再度逆轉向下。
麥狄文
(徐狄怡‧證監會持牌人)
