雖然美國兩黨就債務上限達成協議，但條件係未來兩年除國防開支外，其他錢就唔好亂咁用喇，換句話講，喺2025年1月之前，就算美國經濟可能唔掂，白宮想用財政手段刺激經濟呢，原則上係唔得，當然情況太危嘅話，咪又要等國會批准，到時又要兩黨拗餐死。美股因此個別發展，始終升勢太集中，小心一旦連強勢股都支撐唔住，美股隨時轉勢。
至於港股果然係低處未算低，內地今早公布官方製造業及非製造業PMI齊差過預期，人民幣貶穿7.1關，再創半年新低，港股五窮月可以話衰到底，半日再跌逾400點，創去年11月底以嚟新低。
恒指低開180點，開市價18415已經係半日高位，低開低走，沽壓擴大，半日最多跌456點，見18139低位。恒指中午以接近低位收市，報18178，跌417點，跌幅超過2%；國指跌147點，報6135；恒科指收3610，跌102點。
內地唔單止人民幣弱，就連製造業活動都持續收縮，經濟復甦「強預期，弱實現」，令中港兩地股市表現每況愈下。藍籌股僅五隻股份逆市升，表現最好嘅創科(00669)僅升1%，已經係表現最好藍籌股。大笨象(00005)跟友邦(01299)齊齊跌逾2%；港交所(00388)半日再跌1.7%；內地金融股同樣下跌，建行(00939)跟工行(01398)跌逾1%，平保(02318)半日跌3.1%。
科網股弱勢持續，嗶哩嗶哩(09626)明日公布季度業績，半日跌6.1%；網易(09999)半日跌逾半成，藍籌之中跑第尾。ATMJB全線向下，美團(03690)半日再跌4.4%，創52周低位；京東(09618)仲衰，半日跌4.4%，又創上市後新低。其他科網股普遍錄得超過2%跌幅。
人民幣每況愈下，再創半年低位，內房股繼續捱沽，噚日已呼籲咗大家，內房股暫未宜撈低，喺人民幣跌勢未喘定前，對內房股都唔好有任何幻想。至於一直偏強嘅石油股，敵不住油價偏軟，喺高位橫行咗一段時間，但紐約期油都跌穿70美元一桶，今日三桶油跌勢較為顯著。
港股五窮月可以話窮到底，究竟六絕月係絕地反擊，抑或絕種滅亡，睇嚟要睇人仔有冇得反彈，逼近18000點心理關口，估計嚟到呢啲大位，點都會扮吓嘢頂一頂頭鎚，但繼續唔見資金入場嘅話，即係大戶嫌呢啲位未夠低，未肯大手買貨，咁一旦萬八大位再穿，即使有反彈，上到18600至18700點又返轉頭，小心再下破18000，萬七相見。
麥狄文
(徐狄怡‧證監會持牌人)
