美股隔晚假期休市，本來港股應該風平浪靜，畢竟過去三個交易日已跌逾千點，加上期指結算，估計都係靜靜地，不過今早人民幣離岸價再創半年新低，兌美元跌穿7.1，令今早港股再跌近200點，再創6個月低位。
恒指高開23點，大市一度反彈115點，見18666半日高位，但人民幣實在弱得交關，令港股掉頭向下，並跌至接近半日低位收市。恒指半日收報18369，跌181點；國指跌61點，報6189；恒科指跌25點，收3621。半日成交額只有491.83億元，大市落到呢啲位，仍未見成交增加，反映現價依然未有太多趁低吸納買盤入場。
藍籌股整體受壓，大笨象(00005)半日跌0.1%，友邦(01299)跌1%；港交所(00388)低處未算低，再跌1.7%，繼續向下尋底。ATMJB全線向下，騰訊(00700)跟京東(09618)半日跌逾1%，阿里(09988)跟百度(09888)則跌少於1%，而美團(03690)更跌逾2%。不過舜宇(02382)半日升2.6%，為表現最好藍籌股。
人民幣插水，再創六個月新低，對人民幣變動敏感嘅內房股捱沽，唔少股份跌至年內低位，中國海外(00688)錄得12連跌，半日再跌3.1%，其他內房股普遍跌2%以上，整體表現疲弱。除咗融創(01918)受讓綠城天津全運村51%股權，股價飆6.4%。唔係阿Man睇死內房股，一早講咗內房股喺未能解決債務問題，以及銷售未能回復，去庫存仍需時間嘅情況下，喺一段時間之內都係會有波幅，冇升幅，更何況人民幣走弱，對內房股更加係雪上加霜。
基建股逆市造好，但半日升幅收窄，主要係大市整體氣氛麻麻，想升嘅股份亦有心無力，中字基建股，以中車(01766)表現好少少，半日升4.5%，其他基建股半日升幅由不足1%至2%不等。
港股繼續向下尋底，恒指跌逾千點仍未識得反彈，市場氣氛差到一個點，暫時亦無乜其他好消息，即使阿爺曾於1月及3月份放水，可惜未能對經濟帶嚟太大刺激，經濟復甦不似預期，內地政策風險及地緣政治風險等等，都無法令外資對中港股市投下信任一票。單靠內地資金自顧自炒作買賣，塘水滾塘魚，港股不但走得唔遠，更持續向下尋底。
麥狄文
(徐狄怡‧證監會持牌人)
