美股隔晚表現牛皮，主要係市場正等待美國今晚公布CPI，以推斷聯儲局之後嘅貨幣政策、加息步伐快慢等等，道指升98點，標指幾乎持平，納指則跌52點。內地股市今日表現唔錯，以為港股都應該可以靠穩，守住條50天線(20442點)，無奈騰訊(00700)表現強差人意，繼噚日顯著下跌後，今日繼續走弱，拖累大市半日跌逾百點，50天線再度不保。
恒指開市微跌3點，一度倒升9點，見20494半日高位，可惜喺騰訊拖累下，回復跌勢，最多跌188點，見20296半日低位。恒指半日收報20363，跌121點；國指跌54點，報6895；恒科指跌逾1%，收4201，跌46點。半日成交額只有548.41億元，買賣兩閒，缸邊友都畀港股悶親，無心戀戰。
藍籌股個別發展，大笨象(00005)跌1.3%，友邦(01299)升近1%，港交所(00388)則跌0.9%。汽車股表現較弱，比亞迪(01211)繼續被股神旗艦巴郡減持，半日跌近2%；吉利(00175)亦跌1.6%；4S汽車股中升(00881)更跌4.3%，成為表現最差藍籌股。至於表現最好嘅係中芯(00981)，半日升6.4%。
科網股半日表現較為疲弱，騰訊主要股東南非Naspers旗下子公司Prosus，為實行其回購計劃，再將9600萬股騰訊股份存入CCASS，以便於市場沽出。騰訊半日股價跌3.7%，拖累恒指跌64點。其他科網股同樣走弱，內地規管生成式AI，百度(09888)半日跌1.9%，阿里(09988)亦跌2.1%，京東(09618)跌3.3%，快手(01024)跌2.1%，美團(03690)跌2.7%。
不過，噚日先升後跌嘅商湯(00020)，今日反而升1.8%，商湯一向唔係阿Man杯茶，公司雖然有AI概念，亦早早預咗呢類科網公司，初期要燒銀紙，無錢賺唔緊要，但公司收入連續兩年下跌，呢一點就令阿Man難以接受。呢種股票跟風炒作還可以，無謂同佢玩認真。
雖然短期美息仍有上調空間，但市場憧憬美息最快下半年或今年第四季下調，美元下半年或轉弱，金價重上2000美元之上，金礦股逆市造好。當中以靈寶黃金(03330)表現最強勁，急升11.1%；其他金礦或相關股半日錄得1%至8%升幅。今日電訊股亦見逆市向上，全線造好。中興(00763)將今年中國政企業務增長目標定在四成以上，股價半日急升7.1%。
暫時港股仍無法企穩50天線，主要都係成交未能配合，早兩日仍見金管局要承接港元沽盤，反映目前未見外資流入，試問無資金支持，港股邊夠上升動力。
麥狄文
(徐狄怡‧證監會持牌人)
