美股上周五先跌後回升，早段因為德銀嘅股價盤前急跌，CDS急升至173點子，反映其違約風險急升，又拖累銀行股向下，不過其後德銀提早贖回其債券，令跌幅收窄至3%，美股亦反彈，三大指數回升。不過人民幣離岸價今早又跌，港股一度跌逾400點，臨近中午收市阿里(09988)回升，港股一度止跌回升，但半日仍跌100點，失守250日線(19838點)。
恒指低開63點，低開低走，一度跌406點，見19509半日低位，失守20及250日線，但10日線(19508)暫見支持，半日跌幅收窄，一度倒升23點，見19938半日高位。中午恒指報收19815，跌100點；國指跌68點，報收6726；恒科指半日73點，報4151。半日成交額752.96億元，略有增加，似乎接近10日線有買盤出嚟博一博。
雖然中午前大市由低位急抽400點至19900水平，跌幅大大收窄，但整體市寛麻麻，藍籌股普遍下跌，美團(03690)派完成績表，雖然業績好過預期，但股價半日插水4.4%；其他重磅科網股只有阿里半日倒升，盤中曾升5.5%，不過中午升幅少過2%；騰訊(00700)、京東(09618)半日跌逾2%。小米(01810)智能手機出貨量大減兩成，上年少賺六成，半日股價跌3.1%；百度(09888)跟網易(09999)亦腳軟。宏橋(01378)半年盈利跌逾四成，股價半日跌5.1%，藍籌之中表現最差。中石化(00386)減少派息，另建議發新A股予控股股東，募集資金總額不超過120億人民幣，中午跌3.2%。中字股今日普遍下跌，之前強勢已逆轉，有貨喺手都好睇位止賺，賺少啲都好過倒輸。生科股半日逆市做好，板塊內股份閒閒地升2%，更有個別股份升逾半成，藍籌之中係生科股逆市向上。
唔係阿Man要睇死內房跟物管股，但確實呢兩個板塊升一日半日又無影，今日呢兩個板塊又腳軟，尤其物管股沽壓較沉重，整個板塊內嘅股份，至少跌2%或以上。話咗呢兩個板塊因為債務問題被沽壓體無完膚，除非銷售得到明顯改善，否則難改有波幅，冇升幅嘅困局。水泥股今日表現亦差，中國建材(03323)急跌近9%，華潤水泥(01313)亦跌7.7%，其他水泥股普遍跌1%或以上。
本周四期指結算，呢幾日港股都會較為反覆，暫時20日及250日線為關鍵，即係19800企唔到，下一步將下試19500至19600，即係考驗10日及100日線，一旦19500失守，上周低位18800岌岌可危，大家要小心，至少現貨上周阿Man都有講過，20000係一個唔錯嘅套利機會，若然無好好把握，要有心理準備，隨時又要捱多一千幾百點。
麥狄文
(徐狄怡‧證監會持牌人)
