美國聯儲局官員放鷹後，美股呢兩晚表現反覆，隔晩將周二晚反彈升幅抹去，三大指數下跌，港股今早低開但高走，繼續喺21300水平爭持，成交則縮水至剛剛過500億元。
恒指低開129點，跌幅一度擴大至132點，見21151半日低位，不過A股回升帶動港股由跌轉升，恒指曾升149點，見21433半日高位後回順。半日恒指升73點，報21356；國指升22點，收7211；恒科指則升24點，報4455。半日成交額只有516.58億元，買賣兩閒，暫未見有新資金入場。
藍籌股個別發展，ATMJ只有美團(03690)繼續走軟，跌0.2%，騰訊(00700)、阿里(09988)半日分別升0.8%及1.3%，京東(09618)亦靠穩，微升0.18%。友邦(01299)半日彈1.3%，但大笨象(00005)偏軟跌0.3%；港交所(00388)亦跌0.2%，似乎340元由之前支持位變成阻力位，其他內銀股半日亦下跌。
內地官媒發表文章，關注近日AIGC概念股熱炒，表明盲目跟風炒作有危險，相關概念股今日顯著下跌，百度(09888)跟網易(09999)半日分別跌5.3%及1.6%，美圖(01357)更跌近8%。噚日急升四成嘅知乎(02390)，半日回吐12%，不過商湯(00020)由跌轉升，錄得0.4%升幅。其實AIGC概念暫時都係炒作，隔晚Google嘅BARD聊天機械人講錯嘢，股價即急跌8%，可見呢個概念炒作，係高回報高風險，參與炒作要睇緊啲，有唔對路要嚴格執行止蝕。
雖然永利澳門(01128)公布上季虧損擴大至2.36億美元，但股價半日升6.7%；美高梅中國(02282)同樣由盈轉虧，股價亦炒高超過5%。其他濠賭股全面向上，升幅由2.3%至7.7%不等。濠賭股上季預咗蝕錢，但炒股講前景，自內地重新開放後，預計今年澳門娛樂事業可逐步回復至疫情前水平，資金炒作濠賭股業績今年大翻身。但阿Man唔敢太樂觀，尤其貴賓廳收入大不如前，賭場睇怕係旺丁唔旺財。
通達(00698)宣布附屬公司獲批准於A股上升，股價半日急升近兩成，其他手機設備股亦乘機落鑊，舜宇(02382)跟瑞聲(02018)半日齊齊升逾3%，高偉電子(01415)同樣錄得3.2%升幅，比亞迪電子(00285)升0.9%，眾手機股中，算係最無本事。小米(01810)半日升4.2%，成為最大升幅藍籌。
港股暫時無乜方向，指數窄幅上落，幾百點之間浮游，不過喺欠缺新資金入場下，反彈乏力，而美滙指數守住100大關，自然不利資金流入新興市場，喺缺乏資金同新借口之下，港股短線調整持續，恐怕係易跌難升。
麥狄文
(徐狄怡‧證監會持牌人)
