隔晚美股因為聯儲局有官員放鷹而下跌，但到鮑爺講話時未有發表更鷹言論，更表示通脹降溫，令市場又再興奮，美股先跌後回升，三大指數更倒升收市。港股隔晚ADR變動唔大，今早表現則反覆，暫時喺21300水平好淡爭持。
恒指低開14點，其後升144點，見21443半日高位後回軟，一度倒跌119點，見21178低位後回升。半日恒指收報21356，升57點；國指則報7213，跌18點；恒科指跌59點，收4456。半日成交667.13億元，暫時都未見資金湧入掃貨，買賣雙方態度審慎。
藍籌股個別發展，金融股今日表現唔錯，友邦(01299)半日升近1%，建行(00939)跟工行(01398)半日分別升0.8%及1%，大笨象(00005)半日更升2.2%；不過港交所(00388)半日則無起跌，暫時受制於340元水平。至於汽車股今日表現較弱，因春節假期提前令銷售下跌嘅吉利汽車(00175)，半日跌2.2%；比亞迪(01211)則跌1.1%，暫時仍守於240之上。
雖然隔晚納指表現唔錯，但今日科網股沽壓較大，美團(03690)半日跌7%，藍籌之中跑第尾，主要係抖音外賣傳下月全國上線，美團將迎來一個強勁競爭對手。阿里(09988)旗下「餓了麼」，亦要迎戰，阿里半日跌1.1%唔算多。至於近日熱炒嘅AI概念股商湯(00020)，被主要股東日本軟銀減持，股價半日跌3.8%；百度(09888)噚日急升逾一成半後，今日見回吐，半日跌唔夠4%，相對近日累積升幅回吐壓力唔算大。至於京東(09618)跟騰訊(00700)，前者跌，後者升，幅度都係0.8%，QQ呢期都算硬淨，成為支撐恒指嘅核心股份。其他科網股偏軟，回吐幅度由超過1%至6%不等。
金融股今日偏強，本地銀行股更全線上升，除咗大笨象造好外，恒生(00011)半日升1.6%，渣打(02888)升2.8%；其他本地銀行股升0.8%至最勁嘅大新金融(00440)升7.2%。電力股今日繼續造好，當然係火電股繼續做領頭羊，不過電力股較受煤價波動所影響，若然作為中長線投資，阿Man都係睇好綠能股多啲。
暫時港股喺現水平好淡爭持，恒指由高位跌逾千點後，先後失守10天及20天線，短線20天線未能收復嘅話，調整仍要持續，回補20800至21000裂口機會大，若然回補裂口後未能回升，則有需要再向下考驗50及250天線，亦即20100至20300水平。
麥狄文
(徐狄怡‧證監會持牌人)
