美股隔晚個別發展，雖然納指隔晚勁升逾3%，但重磅科技股派完成績表腳軟，拖累唔少科技股盤後顯著回吐，納指期貨亦急回，加上A股向下，港股半日曾跌近500點，失守20日線(約21685)。恒指低開147點，跌幅曾略收窄至137點，見半日高位21820，但其後跌幅不斷擴大，更失守20日線，最多跌498點，見21459半日低位，其後跌幅略略收窄。半日恒指報收21558，跌400點；國指報收7358，跌147點；恒科指跌86點，收報4610。半日大市成交額717.82億元，以咁嘅跌幅嚟講，沽壓又唔算嚴重，但似乎就未有資金肯趁回調入場，可能係周末前夕嘅關係。
藍籌股整體偏軟，尤其今日股今日全線走弱，大笨象(00005)顯著下挫3.3%，以佢之前咁強勢嚟講，今日可以話走勢明顯轉弱。友邦(01299)亦逼近50日線(84元)支持，一但失守，或進一步下試80元心理關口。其他內銀股亦走軟，但跌幅不足1%，扲嚟講呢個板塊一直都係落後大市，依家只係繼續落；反而平保(02318)半日跌逾4%，國壽(02628)半日亦跌逾3%，內險股走勢較弱。比亞迪(01211)半日跌3.2%，巴郡再減持比亞迪，阿Man都講咗比亞迪雖然強勢，但再強都好，去到啲阻力位，你唔沽，股神一樣會沽。恒隆(00101)半日升2.7%，為表現最好藍籌月股。
科技股整體受壓，ATMJ全線向下，騰訊(00700)半日跌近1%，阿里(09988)跟美團(03690)半日跌2.7%及2.8%；京東(09618)半日跌3.2%，暫時ATMJ都係去到阻力位回調，睇回調幅度會唔會再擴大少少，買貨可以等下星期。其他科網股亦全線向下，呢排炒AI概念嘅百度(09888)，半日跌逾半成；不過炒緊相同概念嘅商湯(00020)半日竟然逆市升2.6%。
內房股全線向下，唔係阿Man睇死呢個板塊，事實上係一日債務問題未解決，內房股都係濕滯。有消息指恒大(03333)全國458個樓盤優惠促銷，市場擔心拖累全國所有樓盤要減價促銷，所有內房股走軟，下跌幅度由超過1%至超4%不等。物管股沽壓更大，碧服(06098)半日跌6.4%，其他物管股閒閒地跌逾2%。
美元滙價止跌回升，金價回軟，國際金價從9個月高位回落，金礦股亦遭拋售，以招金(01818)跟中國黃金(02099)半日跌逾6%，其他金礦股跌2%至4%不等。至於港股先後失守10日及20日線，短期仍然有回調壓力，留意今日20日線能否失而復得，若能守20日線，有機會反彈至21800水平，若萬阻力無法衝破，回調將持續，回調目標為20800至21000左右回補上升裂口。
麥狄文
(徐狄怡‧證監會持牌人)
