美國10年長債息回落至4%，美滙指數亦跌穿110，噚日午後人民幣急彈，帶動港股今早繼續反彈，早段曾彈完500點，不過去到15800水平已乏力再上，恒指半日升幅縮水近半收市，不過恒科指仍然企穩3000水平，半日錄得逾2%升幅。
恒指高開403點，升幅一度擴大至515點，見15833半日高位，但高位乏承接兼有沽壓，升幅縮水至258點，見15575半日低位。中午恒指報收15584，升266點，國指升89點，報收5306；恒科指則升65點，報收3021。半日成交額665.45億元，較上日略為縮減，明顯資金都唔願意追貨。
藍籌股大致向好，大笨象(00005)升0.2%，友邦(01299)升3.3%，港交所(00388)半日升唔夠1%，平保(02318)半日升2.8%。百威(01876)第三季業績多賺8.7%，喺疫情下仍有增長，股價半日急升6.1%。相反，表現最差藍籌為石藥(01093)，半日跌3%。
債息回落利好對息口走勢較敏感嘅科網股，今日科網股繼續反彈，噚日較落後嘅阿里巴巴(09988)今日發力，半日升5.6%，京東(09618)亦升8.8%，又係追返噚日升少咗嘅升幅，兼成為半日表現最好藍籌股。騰訊(00700)跟美團(03690)齊齊升逾2%，其他科網股普遍向上，升幅由不足1%至超過5%不等。
今日表現最差板塊係火電股，華能(00902)上季虧損雖收窄，但半日仍要跌7%，而上季勁蝕6.4億人仔嘅大唐發電(00991)半日大跌25.3%，成為表現最差個股，咁嘅跌幅唔知以為係三四線股仔。其他電力股半日閒閒地跌4%以外。
電子煙股噚日見資金追入，噚日升咗14%嘅思摩爾(06969)有北水追入，半日再升17.7%，已經連升三日，其他電子煙股亦向上，只係升幅由0.7%至近6%不等，動力遠遠不及思摩爾，所以幾時買股都係買返行業龍頭有着數。
期指明日結算，暫時港股企穩咗15000大關，能夠進一步反彈要待結算過後先有較明確方向。不過阿Man已經講咗，港股要扭轉弱勢，至少恒指要上返16500至17000企穩，否則呢下反彈完，又可能繼續其尋底之旅，畢竟暫時未見中港經濟有太大起色，二十大亦無乜特別利好消息出台，單靠人民幣反彈帶動呢下股市向上，喺外資仍然力掟中港股票下，暫時中港股市靠穩都偷笑。
麥狄文
(徐狄怡‧證監會持牌人)
