隔晚美股反彈，個別美企公布業績表現唔錯，美股借勢反彈，道指跟標指升逾1%，但納指升不足1%較為遜色，主要係市場預期下周聯儲局議息，從利率期貨分析，加息0.75%幾乎已無懸念，高息較為不利科網股，令科網股表現較差，納指走勢亦跑輸其餘兩個指數。至於港股今早表現反覆，萬五關失而復得，半日總算守得住，恒指倒升逾百點。
恒指今早高開61點，即見沽壓，再跌穿尋日低位15082，最多跌233點，見14947半日低位，又創13年半新低。但其後低位見有買盤進場，大市止跌回升，其後一度升254點，見15435半日高位。中午報收15313，升132點；國指升90點，報收5205；恒科指盤中曾反彈6%，但半日升幅收窄至不足4%，升110點，報2912。大市半日成交額849.67億元，當中北水錄得淨流入超過40億元。
藍籌股個別發展，平保(02318)旗下平安銀行今年首三季盈利升25.8%，股價半日升2.1%，友邦(01299)跌0.9%，港交所(00388)半日再跌0.9%。中午公布第三季業績，列賬基準稅前盈利跌42%，暫時唔派息，不過都預咗，只係噚日股價無大插，今日出完業績唔知會唔會追返啲跌幅，下半場可能瓜多過菜。
科網股今早低開，先跌後反彈，騰訊(00700)一度跌穿200大關，低見198.6元，半日倒升2.2%；京東(09618)跟美團(03690)分別倒升5.2%及3.2%，阿里巴巴(09988)險守60，半日彈返4.7%，旗下阿里健康(00241)升7.6%，係半日升幅最大藍籌股。其他科網股普遍先跌後回升，半日升幅由超過3%至7%不等。
地產股係少數無份反彈嘅板塊，美聯儲局下周議息，加息0.75%幾無懸念，息率高企下，地產股當然無運行。本地地產股普遍跌超過1%，而新地(00016)跟新世界(00017)半日跌逾3%。本地地產股走弱，內房股亦唔好得去邊，強美元下人仔屢創低位，今早離岸價跌穿7.3，內房股沽壓未止。就連中海外(00688)呢啲有阿爺撐腰嘅內房，半日亦要跌4.6%，更成為表現最差內房股，其他內房股普遍下跌，大市回升亦未能扭轉跌勢。
過往港股單日出現超過6%跌幅，通常翌日再低開都好大機會V彈，但今次呢個情況未有發生，雖然港股低開失萬五後失而復得，不過半日反彈嘅力度，完全唔似係出現V彈嘅氣勢，尤其係噚日大成交下，指數幾乎殺到全日低位收市，好明顯沽貨嘅並非散戶之流。雖然北水有接貨，但相比起外資沽貨嗰種凶狠，北水似乎亦招架不住，暫時港股尚未出現見底訊號，再加上周五期指結算，呢兩日港股會繼續反覆，暫時未宜入場撈底。
麥狄文
(徐狄怡‧證監會持牌人)
