隔晚美國公布PPI,數據略高於預期,反映通脹仍然高企,美股表現偏軟。不過唔少淡倉開始喺低位食糊,淡友開始無咁進取,主要係市場已消化晒年底美息將升至4.25%水平,除非通脹喺今年餘下時間再失控地狂升,否則明年息率可能喺4.5-4.75%見頂,淡友亦再無藉口可以狂質個美股。與此同時,唔少之前估值過高嘅美股,經過一輪調整,已回落至合理水平,除非有重大利淡消息,否則喺今個月議息過後,只要息率有清晰路線圖,美股可能借勢震多一下,有機會搵到個底,尤其近日連之前表現較為硬淨嘅大價股,都已經跌埋一份,強勢股通常係熊市最後一根稻草,連啲強勢股都跌埋,咁美股應該可以見底。不過見底還見底,要步出熊市仍要經過一段長時間收集,即使美股見底,都只可以畀啲耐性,分段收集,距離大牛市仍有好遙遠嘅路。
至於港股真係無嘢好講,淡友仍然佔上風,恒指五個交易日累跌1386點,今早跌勢持續,盤中一度再跌逾二百點。恒指幾乎平開,其後跌過百點後反彈,倒升35點見16736半日高位。可惜16800影都唔見就腳軟,沽壓增加之下再跌232點,見16468半日低位。目前喺16500水平爭持,暫時未見好友有本事反攻,就算內地股市倒升,港股仍然無動於衷。恒指半日跌166點,報16534;國指則跌75點,報收5616;恒科指跌55點,半日報3213。半日成交額只有430.93億元,話咗就算噚日有過千億成交,大市盤中曾挾升至17000水平,都係未見有真正買盤入場,缺乏資金支持下,港股只有繼續陰乾。
藍籌股普遍下跌,ATMJ噚日下晝短暫精壯後,今日又打回原形,其他金融股維持唔到噚日嘅升勢,反而係大笨象(00005)半日彈返0.6%,叫做衰到貼地彈一彈,但股價喺40元樓下,都無咩好講,長期捧場嘅股東,一樣喊得一句句。
內房跟物管股今日跌勢顯著,外電指旭輝(00884)有美元債持有人,仍未收到昨日到期利息款項,半日大跌10.3%;同系旭輝永升(01995)也瀉10.8%;市場擔心碧桂園(02007)步其後塵,半日跌8.5%,同系碧服(06098)盤中曾跌13%,半日跌9.7%,藍籌之中表現最差佢兩個。其他內房股跟物管股全線插水,跌幅少過2%都要還神。
電力股反而今日表現唔錯,大唐新能源(01798)上月發電量增37.3%,半日炒高8.5%,其他電力股普遍錄得2%升幅,火電股升勢更強,華電(01071)、華能(00902)、潤電(00836)跟大唐發電(00991)半日升逾7%。
港股嚟到呢啲位都仲未識得彈,真叫人深灰意冷,阿Man都無眼睇,決定明日出城玩返一個星期,《盤房來料》明日起暫停至下周四,下周五21日回復正常。
麥狄文
(徐狄怡‧證監會持牌人)