熱門:

2022年9月7日 即巿股評 港股直擊

【盤房來料】港股勢弱持續向下尋底

美國十年期債息升至3.35%,科技股首當其衝,反映中概股表現嘅金龍中國指數跌逾3%,納指連跌七個交易日。隔晚美股三大指數持續下跌,標指受制反彈阻力4000,睇嚟有機會向住3500點出發,而納指同樣受制反彈阻力,兩個指數至少有一成下跌空間。美債息上升之際,美匯指數同時向上,更創紀錄新高,其他貨幣跌到一仆一碌,資金流向美元,股市當然無乜好面口睇。內地公布上月進出口數據又差過預期,人仔已逼近七算,若然阿爺無力保七底,真係無眼睇。港股今早開市即失19000心理關口,再創五個半月新低。

恒指低開286點,跌幅曾收窄至206點,見18996半日高位,之後跌勢再度加劇,最多跌358點,見18844半日低。中午恒指報收18880,跌322點;國指跌94點,報6461;恒科指半日跌逾2%,失守4000關,報收3973。半日成交額478.16億元,指數跌至現水平逾五個月低位,仍未見資金願意入場。

藍籌股乎全軍覆沒,重磅股普遍下跌,友邦(01299)跟大笨象(00005)分別跌3%及2.9%;恒生(00011)則創52周低位,半日跌1.6%。港交所(00388)亦跌至一年低位,半日跌1.8%,暫險守300元大關。內地疫情反覆,中秋假期澳門酒店訂房只有四至五成,金沙(01928)更銀娛(00027)半日跌2.4%。比亞迪(01211)新能源車銷售理想,股價連續第二日反彈,半日升1.4%,係少數逆市升嘅藍籌股。

雖然中美已就中概股審計達成協議,但美國SEC告誡美國會計師慎接中概股公司為客戶,咁講難免令人有諗法,覺得中概股啲數都係流口水,金龍指數隔晚急跌3.45%,今日呢啲股份喺港股梗係又捱沽。ATMJ無一倖免,半日跌幅全部都超過2%,其他科技股及中概股跌幅更大,閒閒地跌4%或以上。

中資電力股今早先升後回,電企成功發債,紓緩中央發電企業壓力。不過電力股高開後,都難逃被沽貨套現命運,全部半日倒跌收場,華電(01071)喺創完52周高位後,半日倒跌0.6%。

呢排炒到出煙嘅新東方在綫(01797)借轉型消息大炒特炒,噚日股價急升逾三成,再創52周高,但今早則跌近15%,呢啲擺明係泥漿捽角,入場跟勢炒要有心理準備,一有唔妥隨時撤退,不過阿Man就寧願食花生,呢類股份大上大落,純粹賭博,都係少沾手為妙。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads