隔晚美股休市，美滙指數再升，升破110大關，歐羅跟英鎊持續弱勢，歐洲受能源危機困擾，俄羅斯為報復西方國家制裁，宣布無限期關掉天然氣管道北溪一號，歐洲天然氣價急升逾三成，最終升幅收窄至一成收市，而油價跟隨反彈4%。喺美滙指數表現強勁下，人民幣受壓，兌美元離岸價直迫七算水平，為遏止人民幣下跌壓力，內地宣布下調外滙存款準備金率2%，為市場增加美元流動性。
雖然阿爺減RRR，但隔晚夜期唔見得有幾興奮，市場對於呢啲所謂好消息似乎無乜反應。即使A股今早先跌後回升，但港股卻高開低走，恒指一度跌逾百點。恒指高開36點，最多曾升132點，見半日高位19358，但其後掉頭向下，半日最多跌118點，見19107低位。中午恒指收報19144，跌80點；國指跌45點，報6531；恒科指跌31點，收4032。半日成交額只有449.21億元，個市落到萬九邊都無人願入場買嘢，港股真係死到直一直。
藍籌個別發展，大笨象(00005)跟中移動(00941)半日升0.7%。比亞迪(01211)8月新能源汽車銷量成績唔錯，反彈1.1%，不過股神未有耐清倉，喺佢持續減持陰影下，彈返上嚟反而係造淡佢世界嘅機會。內地限制中秋節假期青少年打機時間，騰訊(00700)半日跌2%，呢個係大市升唔起嘅原因之一，話晒騰訊佔恒指比重大，佢升唔起，個市叻得去邊。
阿爺降準，有如為內房降甘露，內房跟物管股造好，碧桂園(02007)上月銷售面積按月微升，半日升近8%，為升幅最大藍籌股。只係降準又如何，內房產業嘅債務問題仍未解決，降準消息消化完，內房同物管股隨時又打回原形。
生科股繼續偏軟，因為美滙指數高企，同埋市場預咗今個月聯儲局加息0.75厘，再加埋加大馬力縮表等等，對於未有盈利嘅生科股，喺融資成本上升下並非好事，所以呢期呢個板塊難有運行。除非個別股份有特別消息，否則整體暫時都係較為疲弱。
至於大市喺成交薄弱下，易跌難升，只不過成交低迷，大戶更易將指數舞高弄低，若然散戶一面倒睇淡，隨時又借頭借路挾淡倉。總之都係見步行步，造好造淡無乜所謂，都係餐搵餐食，盡量短炒。
麥狄文
(徐狄怡‧證監會持牌人)
