美股隔晚保持升勢，市場繼續risk on，納指跑贏升逾1%，但金龍中國指數逆市跌，港股噚日裂口高開反彈之後，今早幾乎蒸發噚日全部升幅。恒指低開78點，一度見20827點半日低位，但其後跌幅擴大，盤中最低見20586，跌逾300點。中午恒指收報20604點，跌285點；國指跌75點，報7103；恒科指半日跌8點，算係跑贏大市，收4568。成交額只有487.3億元，維持低水平，好聽係成交唔大，沽壓唔算嚴重，難聽啲就係水盡鵝飛，無人願入場。
先講返美股近日乜嘢消息都好似當咗好消息嚟炒，係典型嘅熊市反彈，雖然唔少企業公布業績後，都調低咗全年盈利預測，又或者係業績倒退，甚至唔睇好經濟前景，宣布裁員或減慢招聘，但市場對呢啲消息都視若無睹，反而喺經濟或可能陷入衰退下，聯儲局或掉返轉頭再放水，家陣市場就係因為呢個因素，投資氣氛大大改善。至於美股係咪真係咁好景，阿Man認為仍有待觀察，但美元強勢令資金從新興市場流走，中港兩地股市未能扭轉弱勢就係事實。
先唔講本身內房債務問題，搞到市場氣氛有幾差，資金不斷流向美元，令中港兩地股市成交縮減，已經令到兩地股市易跌難升，跟美股嘅情況相反，港股稍有利淡消息，就被放大，好似今日友邦(01299)被大行降一降目標價，半日就跌咗4.8%，仲要跌穿埋80元心理關口，走勢上都幾難睇，亦拖累恒指跌84點。至於其他重磅股普遍向下，ATMJ中， 除咗京東(09618)逆市升0.4%，其餘都跌逾1%，反而網易(09999)半日升3.5%，成為最大升幅藍籌股。
內房物管股跌勢未止，有內地消息指碧桂園(02007)旗下債券「21碧地02」盤中臨時跌停，股價半日跌3.8%，同系碧服(06098)半日更跌6.4%，創52周低位。其他內房物管股，閒閒地跌2%或以上，睇嚟阿爺真係要出招救救呢個板塊先得。
內地計劃吸歐洲企業來中國上市，傳濰柴(02338)旗下德國叉式起重車製造商凱傲(Kion)將成目標，濰柴半日揚2.9%，還帶動其他建築重機股逆市上升，家陣市場無乜利好消息，稍有利好消息，資金就會流入嗰個板塊。
港股今日叫做補晒噚日個上升裂口，但又重返條頸線之下，又似乎唔多好睇，不過咁嘅成交額，反映市場係買賣兩閒，根本無乜方向，目前要先解決氣氛問題，先要內房同內銀就內房嘅資金問題要搵到解決方法先得，否則就算有其他利好消息，個市都好難發力。
麥狄文
(徐狄怡‧證監會持牌人)
