上周美國公布非農數據遠高於預期，強勁嘅就業數據令聯儲局有機會進一步加息，而市場亦接受7月聯儲局議息將加息0.75厘，雖然10年期債息重上3厘，旦但2年期債息更升至3.12厘，兩者出現倒掛。債息倒掛係因為通脹高企，利率必須要繼續上調之際，經濟卻有機會步入衰退，呢個就係短息升，長息落嘅原因。美股指數期貨向下，納指期貨更跌逾1%，港股今早低開低走。
恒指低開255點，見21470已經係半日高位，其後跌幅持續擴大至最多跌637點，見21088半日低位，接近50日線(21011)，暫時50日線加上係21000心理關口，應該有支持。半日恒指報收21130，跌595點；國指半日跌227點，報7324；恒科指半日跌178點，報4629。唔單止港股走軟，內地股市亦腳軟，深圳創業板指數跌幅更超過2%。
藍籌股幾乎全軍覆沒，只有信義光能(00968)跟中生製藥(01177)半日逆市分別升0.3%及1.1%，聯通(00762)半日則無起跌。今日表現較差嘅兩個板塊，係汽車股跟內房物管股，前者無乜特別消息，之前累計一定升幅，有回吐都好正常。至於內房物管股就因為「港股通」名單有調整，深交所表示，將融創中國(01918)、中國恒大(03333)、恒大物業(06666)、中國奧園(03883)、世茂集團(00813)、佳兆業集團(01638)從「深港通」剔除，拖累整個內房物管股板塊走弱，而碧桂園服務(06098)半日跌逾11%，更成為半日表現最差藍籌股。碧桂園(02007)半日跌7.5%，龍湖(00960)挫5.3%、中海外(00688)跌3.2%。
另一個受利淡消息困擾嘅板塊係科技股，國家市場監管總局噚日發文，根據《中華人民共和國反壟斷法》，對28宗未依法申報違法實施經營者集中案件作出行政處罰決定，當中涉及嘅騰訊(00700)半日跌近3%；至於上星期累升8%嘅阿里巴巴(09988)跌近6%；京東(09618)亦跌近4%。美團(03690)則跌4.8%。其他科技股閒閒地跌4%以上，其中明源雲(00909)急跌一成半，跌穿10元。澳門因為疫情關係，今日起工商業場所包括賭場要停運七日，賭業股捱沽，普遍跌幅超過半成。
一如阿Man所料，港股處於上落市之中，之前大市逼近22000，當大家都以為個市可以更上一層樓，阿Man已提醒喺移動區間接近頂部不宜追貨，到家下個市又回落至移動區間底部21000左右，可以開始分段收集具價值嘅重磅股，包括180元左右買美團(03690)，230元買入京東(09618)，300元買入比亞迪(01211)，呢幾隻會係阿Man心目中想買嘅貨。
麥狄文
(徐狄怡‧證監會持牌人)
