美股上周五V彈，收市倒升，主要係10年期債息回落至2.8%，但債息回落並唔係好事，皆因係市場正打賭美國經濟步入衰退，聯儲局根本無辦法再加息，一諗到呢度，美股指數期貨今日喺亞洲時段就急急腳回落，就算今晚美股獨立日假期休市，美國投資者照樣係期貨市場表示佢哋擔心。
至於港股過完長周期假期返嚟，下半年開局表現反覆，恒指低開169點後，盤中最多跌401點，一度失守20日線(21560)，見21458半日低位，其後A股倒升，帶動港股收窄跌幅至41點，見21818半日高位。恒指中午報收21730，跌129點；國指跌44點，報收7621；恒科指跌20點，報4849。
藍籌股個別發展，美團(03690)半日升2.8%；跟升0.9%嘅阿里(09988)及升2.7%嘅京東(09618)齊齊撐住大市。不過騰訊(00700)被主要股東事先張揚要沽貨，股價半日跌1.2%，暫時跌至350元水平，呢個位應該有啲支持，即管睇下頂唔頂得住。不過金融類股份就有啲腳軟，大笨象(00005)半日跌1.4%，港交所(00388)半日跌3.7%，友邦(01299)亦跌少於1%。上個星期舜宇(02382)無啦啦升到去接近140元水平，跟手就回落，今日第三日跌，半日跌6.4%，成為表現最差藍籌股。
相反假期前見腳軟嘅生科股，今日回勇，香港上市生物科技指數升3.4%。藥明生物(02269)半日升4.6%；中生製藥(01177)半日升逾半成，藍籌之中表現表佳。其他生科股普遍做好，升幅閒閒地接近一成，升逾一成嘅生科股亦唔少。不過喺反覆嘅市況下，追貨值博率唔高，要買都係等回吐先吼位上車。
至於有關內地出遊股，喺內地疫情仍反覆下，即使入境檢疫要求略為放寛，上周五喺A股嘅相關股份已見回吐，今日港股呢邊嘅相關股份亦跟跌。三大航空股齊齊插水，跌幅由超過3%至7%不等。餐飲股半日亦見回軟，九毛九(09922)被大和下調評級，半日跌6%。除咗復甦概念股腳軟之外，濠賭股同樣因為澳門疫情再現而下跌，喺防疫措施收緊下，澳門6月份博彩收入按年大跌62%，僅錄得24.77億澳門元，為2020年9月以來新低。濠賭股普遍受壓，至少跌2%或以上。
港股喺下半年首個交易日表現反覆，不過暫時又睇唔到有乜理由要大幅調整，睇嚟喺21500至22000水平整固，一旦有乜利好消息，稍後仍有機會再一次向上挑戰22500阻力。
麥狄文
(徐狄怡‧證監會持牌人)
