隔晚美股高開低走，三大指數升幅收窄，主要係10年期美債息重返3厘水平，令港股今日表現較為反覆，不過港股喺噚日急升逾500點後，今早雖然一度回吐逾200點，但半日跌幅收窄至25點，維持強勢。
恒指低開76點後，一度跌209點，見21444半日低位，但重磅科技股保持強勢，加上內地股市向上，帶動港股止跌回升，一度倒升90點，見21744半日高位。不過近中午再度回落，恒指半日跌25點，報21628；國指升1點，報7501；恒科指則升23點，報4625。半日成交額增至811.21億元，唔少重磅股股價已上漲，成交額隨之上升亦屬正常。
藍籌股表現好壞參半，金融類股份跑輸，友邦(01299)跌0.9%，大笨象(00005)亦腳軟，內房內險股普遍向下。港交所(00388)雖然官司纏身，但股價反而造好，追落後係主要原因；加上有消息指內地將放滴滴一馬，市場再度憧憬大量中概股回流香港上市，港交所有資金追捧，半日升1.7%。生科股今日續彈，藥明生物(02269)噚日升一成後，今日再升2.8%。
其他藍籌股以科網股表現較強，今日輪到阿里(09988)跟京東(09618)追落後，前者半日升3.7%，重返紅底股，不過能否企定定喺100元之上，阿Man有保留；至於京東臨近618購物節，半日升4.8%。不過噚日受季績帶動勁升嘅美團(03690)，上試200元後未能企穩，半日升幅收窄至0.2%，下半場隨時轉燈。騰訊(00700)半日亦未能高收，受制370至375元阻力，同樣有機會下半場轉燈。其他科網股普遍向上，但動力開始減弱。
教育股今日急升，之前內地完成對教育行業嘅規範指引，中教(00839)新學年招生大幅增長，半日大升23.9%；瑞銀升新東方美股評級至「買入」，本港新東方(09901)股價急升7.2%，其他教育股普遍升一成或以上。至於噚日跌到一仆碌嘅基建股，今日繼續走弱，雖然跌幅已叫收歛，但暫未止跌，不宜貿然入市撈底。
港股反彈至今早水平，恒指能夠企穩21000點，並守於多條移動平均線之上，有條件進一步向上挑戰100天線，即約22000水平，可惜以成交而論，暫未見有大量資金湧入，向上動力有限，加上帶動大市本輪反彈嘅火車頭美團，急升過後，升至200元水平亦開始見回吐，少咗呢隻領頭羊，大市向上動力又再削減一啲。同時，美股搖搖欲墜，一旦美股出現震盪，港股亦難獨善其身，喺現水平再追貨入市，值博率已大大降低，阿Man就寧願食花生，待大市進一步回軟，再趁調整入市勝算將更高。
麥狄文
(徐狄怡‧證監會持牌人)
