內地最新公布的CPI高過預期，喺物價高漲下，通脹數字亦難免高企，不過A股五一假期前後已有阿爺指導，勸戒投資者要睇遠啲，唔好咁短視，言下之意就係叫啲基金大佬手下留情，唔好博命沽貨，A股沽壓減退，上證指數更力守3000點，喺A股半日升逾1.6%帶動下，港股半日亦彈逾300點，能否重上20000大關，就要睇午後能否再下一城。
恒指低開121點，最多跌159點，見19474半日低位，隨着A股造好，港股亦止跌回升，半日最多升354點，高見19988，暫時受制兩萬點關。半日恒指收報19971，升337點；國指收6818，升160點；恒科技插水五日後反彈逾4%，重上4000大關，半日報4087點，升181點。不過半日成交額只有660.33億元，依舊薄弱。
藍籌股個別發展，以內房股表現較弱，中海外(00688)跟華潤置地(01109)半日分別跌4.2%及2.9%，反而噚日急挫嘅碧桂園(02007)則靠穩。科網股反彈，美團(03690)半日升8.2%，表現最醒神，連同騰訊(00700)半日升4.4%，兩股合共為恒指貢獻159點升幅。至於阿里(09888)仍然較落後，半日僅升1.1%，京東(09618)半日則升3%。
有消息指美國總統拜登有意撤銷部份中國產品關稅，體品孖寶有資金追捧，安踏(02020)半日升7.1%，李寧(02331)亦升逾6%。至於大笨象(00005)半日無起跌，友邦(01299)半日則逆市跌0.4%，內銀股亦唔多精神，建行(00939)跟工行(01398)半日跌少於1%。
吉利(00175)純電動車銷量大增，股價半日升6.5%，但仍不及龍頭比亞迪(01211)半日彈7.4%咁勁；理想汽車(02015)首季虧損收窄，半日升逾一成。其他汽車股升幅由超過3%至7%不等。
生科股弱咗幾日，今日終於有下似樣啲嘅反彈，有報道指BioNTech在中國完成復必泰疫苗的II期試驗，復星醫藥(02196)勁升14.7%；科濟藥業(02171)消化系統腫瘤藥研究結果在國際期刊發表，半日勁升10.7%；龍頭藥明生物(02269)半日升近一成，其他生科股半日普遍升3%或以上。
港股經歷噚日大裂口低開高走，短線喺19000至19200料有不俗支持，係A股力撐下，即使美股走弱，港股亦有機會乘A股升勢反彈靠穩。尤其係現貨由21000回調至19200水平，牛證街貨重貨區已屠殺得七七八八，大戶飽餐一頓後，暫亦無誘因再將大市狠沽質低。只係中港兩地股市一直缺水，喺未夠成交配合下，港股暫難重演3月中嘅大幅急彈，加上美股走勢反覆，港股即使呢轉再反彈，亦只能寸進，首要條件係先重上二萬大關並守穩，否則短線又係反覆上落，消磨缸邊友嘅鬥志。
麥狄文
(徐狄怡‧證監會持牌人)
