隔晚美股反彈，主要係美國首季GDP出現倒退，市場憧憬貨幣政策唔會收得太緊，三大指數高收。不過人民幣今早再創半年新低，拖累港股今早曾挫逾600點，但有傳聞話內地今日四點半開座談會，討論平台經濟政策， 會提及遏制資本無序擴張階段性取得成效，並於5月6日將召集平台公司開座談會。市場憧憬內地將有利好科網股消息出台，大市由升轉跌，大市扭轉跌勢倒升，更一度升近600點，並重上10日線(20552)水平。
恒指今早低開4點，受人民幣進一步下滑消息所影響，盤中一度跌236點，見20040，其後受內地座談會消息所帶動，大戶借機挾淡倉，大市掉頭回升，最多升598點，見20875，其後升勢略為回順。半日恒指報收20686，升410點；國指重上7000大關，中午報收7097，升178點；恒科指半日報收4305，升238點。半日成交額669.43億元，以長周末前夕嚟講，都算係咁。
友邦(01299)上季新業務價值減18%，但股價半日仍升0.6%，而中海油(00883)則首季純利勁升1.3倍遠超預期，股價半日升3.5%。恒隆地產(00101)半日無啦啦跌4.2%，係表現最差藍籌股。其他藍籌股升跌都係1%範圍之內，無乜特別。
有消息指中美雙方將就中概股退市會談，市場憧憬中概股退市危機或解除，科網股顯著上升單係阿里(09988)、騰訊(00700)同美團(03690)已為恒指貢獻超過300點，半日分別升9.3%、6.6%及7.9%。京東(09618)半日升7.1%，其他科網股普遍升4%或以上。蘋果公司上季淨收入按年增8.59%，好過市場預期，衰咗咁耐嘅手機設備股借勢反彈，不過長周末前夕都唔建議追貨，有貨反而諗諗要唔要把握機會落車。
人民幣弱勢拖累內房股走軟，整個板塊逆市下跌，不過阿Man都幾肯定內房股最壞時間已過，即使人民幣再走低，相信喺內地陸續有支持內房產業嘅消息出台下，內房股都唔會見返上個月嘅低位，反而個別財務狀況較佳嘅內房股，每次回調係收集機會。
暫時未知內地今日收市後嘅座談會有乜嘢消息出台，港股目前仍然處於上落市格局，喺缺乏大量資金流入下，即使港股估值算平，都只能炒上落，暫時19500係短線較大支持位，而21200點嘅阻力唔細，要重上21200水平企穩，即係20日線成功收復，港股再配合成交，先有機會向上突破，否則大市都係區間移動，大戶上下其手，好淡通殺。
麥狄文
(徐狄怡‧證監會持牌人)
