美股上周五顯著下挫，市場憂慮喺通脹威脅下，聯儲局將大幅加息，有個別揣測加息0.5厘未必能成功抑制通脹，往後每次議息加息幅度會去到0.75厘，對股市帶嚟極大威脅。另一方面，中美債息倒掛，加上內地疫情嚴峻，令人民幣持續疲弱，中港兩地股市今早齊齊跌逾2%。
恒指今早低開353點後，跌幅持續擴大，一度跌633點，見20005半日低位，創超過一個月低位，暫時險守二萬大關，其後跌幅略為收窄。半日恒指報收20103，跌534點；國指跌190點，報6781；恒科指跌114點，半日報收3886。半日成交額645.22億元，呢個成交額近日嚟講唔算少。
大部份藍籌都腳軟，只大四隻藍籌逃過一跌，當中包括半日倒升0.2%嘅美團(03690)，始終市場對公司今年稍後時間有機會扭虧轉盈有一定憧憬。而電能實業(00006)跟萬洲(00288)亦見逆市靠穩微升，電能半日升0.7%，係最大升幅藍籌股；領展(00823)半日靠穩無起跌。大笨象(00005)明日派首季成績表，半日跌4.3%，似乎市場對其業績有啲憂慮。其他重磅科技股以阿里(09988)跟小米(01810)表現較差，前者跌3.5%，後者更跌逾半成；騰訊(00700)跟京東(09618)則跌逾1%，跌勢尚算溫和。
內地股市表現疲弱，亦拖累內險股表現強差人意，新華保險(01336)料首季純利跌最多80%，半日大跌12.5%；其他內險股閒閒地跌3%以上。內銀股亦受招行(03968)前行長田惠宇涉嚴重重違紀違法正接受調查所困擾，由於田惠宇任職招行前，曾於建行(00939)深圳分行任職一段時間，有消息指深圳建行唔少高層亦正接受調查，田惠宇或涉其中，內銀股呢期亦無運行。加上內地降準後，有消息指或於短期內減息以穩經濟，息差壓力大增下，內銀股表現疲弱。
內地新一波疫情漫延至北京，上海已封城一段時間，廣州亦有部份小區部局封城，市場擔心封城措施或伸延至北京，內地餐飲股及消費股捱沽。海底撈(06862)半日跌12%，成為表現最差藍籌股，另一餐飲股呷哺呷哺(00520)亦跌近一成。喺全球多個國家逐步開放邊境，兼且解除大部份防疫措施下，內地堅持清零政策，令經濟裹足不前，為穩經濟而需要減息降準，進一步拖累人民幣下跌，加快資金從內地流走，正正係內地股市一蹶不振嘅主要原因。目前市場被悲觀情緒所籠罩，若然內地疫情未有改善，而防疫措施亦不作適度調節，即使恒指力守20000及上證力守3000呢兩個心理關口，兩地股市亦只能低位苦撐，實難扭轉目前弱勢。
麥狄文
(徐狄怡‧證監會持牌人)
