隔晚美股個別發展，但人民幣跌到嘴歪，兌美元創逾半年新低，港滙指數亦偏弱，明顯有資金流走，拖累中港股市下跌，恒指兩日累跌逾500點後，今早再失守20800支持位，跌逾300點。目前勢頭恒指似要向下回補3月中所遺下嘅上升裂口，裂口底部為20100，而國指跟恒科指則分別跌穿7000及4000點心理關口。
港股低開163點，跌穿3月17日上升裂口頂部20786點，人民幣走弱，令中港股市跌幅擴大，恒指盤中一度跌374點，見20569半日低位，中午收報20580，跌364點；國指報6934，跌163點；恒科指半日收3987，跌3.6%。大市半日成交額581億元又唔算太多，不過資金唔願意入場係令成交萎縮嘅主要原因。
藍籌股普遍下跌，美團(03690)被聯合創辦人王慧文減持，半日跌7.2%，騰訊(00700)跟阿里(09988)半日分別跌4.1%及3.5%，京東(09618)亦跌6.2%，幾隻重磅科技股已為恒指貢獻百點跌幅。藥明生物(02269)半日跌8.8%，成為表現最差藍籌股，噚日同系藥明康德(02359)先行一步，今日輪到藥明追返跌幅。噚日阿Man提過中海油(00883)回A後，股價可能反高潮，今日A股首掛勁升28.8%，但H股果然反高潮，半日倒跌3.2%。至於早兩日跌到死死吓嘅招銀(03968)今日終於彈一彈，不過市弱反彈只有1.7%，咁嘅升幅已經係半日升最多嘅藍籌股。
業績欠佳嘅光伏龍頭A股陽光電源(300274.SZ)，上日大跌兩成後，今早沽壓未止，半日再瀉7.7%，港股呢邊嘅光伏股亦繼續受壓。福萊特(06865)A股停板，H股喺呢邊半日跌11.5%，光伏股之中表現最差。其他光伏股閒閒地跌5%或以上，就連發咗盈喜嘅保利協鑫(03800)亦唔例外。
汽車股雖然有好消息，可惜未能支撐股價升多兩日，今日回復跌勢，阿Man本身最喜愛嘅比亞迪(01211)未能企穩240元，半日跌4.2%，暫時失守10天線。其他汽車股本身已弱過藥煲，有好消息都撐唔起，遇上大市走弱，就更加弱不禁風，衰多兩錢重。
港股自失守22000水平以嚟，已肯定自3月中見底嘅反彈浪告一段落，目前正向下回調再尋找支持，以回調黃金比0.382計，首個目標20800已失守，下一個回調比0.5，目標20300；如果回調目標去到0.618，就要見19800。喺黃金比回調0.5至0.618之間嘅20100點，剛好係3月中反彈浪所遺下嘅上升裂口底部，阿Man估計失守20800點之後，再下試20100至20500嘅機會甚大，呢個位置亦剛好係最後一個牛證重貨區。
麥狄文
(徐狄怡‧證監會持牌人)
