噚日揀咗隻恒指Put(27294)，仲喺噚日朝早以平均入貨價0.206元落場，目標喺恒指可以補返3月17日嘅大型上升裂口。當然，如果唔貪心，或者係想以淡倉逐步逐步向下買落去嘅話，入貨之後喺五分鐘圖上都見到指數向下行，同步亦見Slow STC(14,3)兩線由超買水平回落到超賣至嚴重超賣，呢段時間走隻(27294)亦可，只係呢甫出得Put又未試過喺【輪證贏家】呢個欄上面做一個比較耐少少嘅Trade，就試一次咁多啦。
最近夜晚睇《肥美人》，坦白講都真係幾顛覆傳統高+瘦嘅審美眼光，但認真睇其實班參賽者都真係幾標緻，噚晚準決賽以泳裝同睡衣進行問答環節，反應快、對答如流得好似仲好過傳統選美節目嗰班「佳麗」，可能因為咁搞到我入晒腦，噚晚發夢仲見到其中一位參賽者，場景係我行去後樓梯掉垃圾嘅時侯，轉角見到佢😂，仲同佢講加油😂(後面唔記得啦...自己作埋落去啦)
同我家老爺分享完噚晚嘅怪夢之後，恒指完U，開市跌160幾點唔算好多，但以開市價20780點嚟計，指數算是踩咗入去3月17日嘅大型上升裂口頂部20786點，同時呢口價都將牛證第一層20800至20899點嘅街貨全數收回，呢度有相當於502張期指，熊證第一層街貨仍然喺21200至21299點，所以指數目前仍然都係靠近牛證街貨，又牛證街貨量都比熊證嘅多，就算唔大咬隻Put落到去大型裂口底部20120點，去到20500至20599點嗰過千張期指街貨層，真係肥過班肥美人。
依家955分，指數又同噚日一樣，開市即出現慢活嘅情況，暫時喺五分鐘圖上所見，係有低開高走嘅走勢，不過，保歷加通道由今朝見到通道口拓闊變成整條向下，即係話指數將會喺保歷加下降通道以中軸至底線之間作Swing Trade運行，反正都有隻Put在手，而指數目前仍然靠近重牛街貨的話，就安靜地等佢補裂口啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
