隔晚美股反覆偏軟，債息向上，俄烏局勢再度升溫，聯儲局再有官員放鷹，唔排除聯儲局一次加息0.75厘嘅可能性。呢啲原因，都令到美股偏軟。至於內地股市噚日表現麻麻，雖然人行喺上周五宣布降準0.25厘，但因為之前阿爺已放咗風，仲要市場預期降0.5厘，結果出嚟少咗一半，所以噚日內地股市都冇正面反應，今日就叫好啲，先低後高，帶動港股跌幅收窄。
恒指低開412點，跌幅一度收窄至326點，見21191半日高位，其後沽壓再增加，半日最多跌621點，見20896半日低位。幸而低位有承接，跌幅逐步收窄，半日重上21000水平。恒指半日收報21111點，跌406點；國指跌176點，見7208點；恒科指一度跌4%， 見4146半日低位，中午收報4197，跌122點。半日跌市成交684.82億元，相對上周假期前夕增加咗。
藍籌股大部份腳軟，友邦(01299)跌2.2%，主要係內地疫情反覆，中港兩地短期通關無望，內地業務又再停滯，股價再度失守80元水平。人行降準0.25厘較預期少，但內銀息差仍舊收窄，建行(00939)跟工行(01398)半日分別跌2.4%及0.8%；招行(03968)突然罷免行長職務，更有消息指其被中紀委調查，可能同最近建行深圳分行被調查有關，招行半日急跌逾一成，係半日跌得最多嘅藍籌及國指成份股。平保(02318)半日跌4.1%，港交所(00388)半日跌2.6%。人行呢次降準幫唔到手，內地金融股表現疲弱。反而因為俄烏戰況仍緊張嘅關係，油價喺復活節假期重上110美元高位，三桶油逆市上升。
以為內地對科網股監管可能放鬆，但上海市場監管局近日網上行政約談了美團(03690)跟阿里巴巴(09988)旗下外賣平台餓了麼等12家在上海涉及民生領域電商企業，針對天價農產品等問題，要求加強對平台內經營者嘅管理力度，即係話阿爺對科網股嘅監管未有鬆懈，呢類公司仍然畀阿爺睇到實。其他科網股普遍下跌，計劃裁減直播部門員工嘅嗶哩嗶哩(09626)，半日股價更跌近一成，係表現最差嘅恒科指成份股，其他科網股閒閒地跌2%或以上。
本來煤炭價格高位，係可以支持煤炭股高居不下，但阿Man早有心理準備，阿爺唔會任由煤價持續高企影響企業成本及民生，果然發改委價格司召開專題會議，研究明確煤炭領域哄抬價格違法行為認定標準，一句講晒就係限價，咁煤炭股升咗咁多，呢個消息一出，掉返轉頭行亦正常，整個板塊今日隨大市下跌，其中兗礦(01171)半日跌逾6%，算係回得比較深。不過內地一向對呢類原材料價格都有監控，呢個亦係阿Man唔多鍾意炒內地資源股嘅原因。
大市暫時喺21000水平爭持，不過睇返牛熊證重貨區，今朝落去嗰一下，殺咗20900至20999一堆重牛，不過下面由20500至20899仲有唔少肥牛有機會被劏，睇嚟大有機會再下一城，尤其暫時大市真係無乜利好消息，淡友佔咗上風，好友要反攻唔容易，有淡倉喺手，不妨keep住先。
麥狄文
(徐狄怡‧證監會持牌人)
