美國債息回落,美股隔晚借機反彈,至於港股明日開始放復活節假,阿爺噚日就放定風,好快會降準,通常阿爺開到口,人行好大機會喺同一個周末嘅時候就落實降準,港股彈完兩日,今早繼續向好,但礙於長假期前,資金唔會積極入市,半日成交額不足500億元。其實計返條數,就算人行今次降準1%,向市場投放過萬億元貸款,相對民企債務問題蒸發咗嘅幾十萬億元資金,可以話杯水車薪,所以即使預告降準,今日中港兩地股市都唔係太興奮。
上個月中港股市插到嘴歪之際,阿爺已開始放風會向市場放水,其後兩地股市出現強勁反彈,創A更一度單日勁升超過4%,但上證指數彈到3300左右又行返轉頭。睇返過去內地多次減息降準,A股都只係升一兩日又打回原形,甚至即日高開低走,逆轉形態再級級向下,回復弱勢。原因係降準減息只係經濟太差,為免陷入衰退先放水,加上內地目前疫情惡化,供應鏈嚴重受影響,拉升物價令通脹高企,就算真係降準鬆銀根,市場都唔會太興奮,隨之而嚟嘅,反而係憂慮內地或陷入滯脹困局。所以即使落實降準,對中港兩地股市刺激有限,升勢或僅曇花一現。
恒指今日高開88點後,一度倒跌15點,見21358半日低位,但淡友喺內地隨時宣布降準下亦有忌諱,好友反攻下大市止跌回升,半日最多升180點,見21554,其後升勢放緩,半日喺21450附近上落。目前恒指10天線下移至21765,20天線則上移至21751,兩者形成匯聚區,估計今日都好難向上突破呢個阻力區,主要係欠缺成交動力。恒指半日報收21453,升79點;國指則升48點;報7363;恒科指升39點,半日收4308。
藍籌股大多造好,不過阿里巴巴(09988)屋漏兼逢連夜雨,唔單止畀股神老友芒格減持,外電引述知情人士透露,中紀委傳參與對阿里旗下螞蟻集團嘅調查,半日股價逆市跌3.6%,係表現最差藍籌股。其他TMXJ全線向上,但講真升勢唔算強勁。騰訊(00700)喺380元阻力位前止步,美團(03690)亦未能升越160元阻力,京東(09618)230元亦未能企穩。
總理李克強支持新能源汽車消費和充電樁建設,另外有日媒指中國或成電動車「世界工廠」,汽車股造好,不過阿Man只係鍾情比亞迪(01211),可惜現價又喺阻力位附近,有心買貨待大市回吐,落返220元水平再收集。
麥狄文
(徐狄怡‧證監會持牌人)