噚日揀定隻恒指熊(66311)出嚟，同以前一樣分進取同安全型兩種方式出動。進取型唔駛講，噚日指數喺下半場大約1點55分率先以「大陽燭」向上突破保歷加道中軸，進取型出唔到，就再等安全型；終於，喺2點15分至2點30分，五分鐘圖上Slow STC(14,3)兩線上到80以上超買水後見回落，吼呢個位入隻(66311)的話，以當時(66311)高低位做過0.045元/0.04元計，平均買入價為0.0425元。
一如以往用返做Swing Trade方法的話，即係等Slow STC(14,3)向下回落返去超賣水平就走隻(66311)，不過呢一趟都等得真係_講緊差唔多用咗成個半鐘，先等到Slow STC(14,3)喺五分鐘圖上回返落去超賣至嚴重超賣水平，講緊係大約3點45分，同以15分鐘作為走貨時間的話，即3點45分至全日收市前走隻(66311)，按期內(66311)高低位做過0.05元/0.048元，平均走貨價為0.049元。對比平均買入價，呢一趟平均賺幅有15.29%。
恒指今朝完U後報21667點，跌141點，(66311)如果有過到夜嘅話，應該可以幫到4月第一注嘅負數報仇，但係「如果」嘛，咁就更係無啦，唯有即市再努力。
以今朝恒指開市價計，指數率先將第一層牛證21700至21799點嘅街貨全數收回，呢度有相當於206張期指，而重貨區都近在咫尺，不過呢層都只係有相當於705張期指，可能阿市嫌呢度未儲夠過千張期指街貨，所以指數喺正式開市之後，都只係Keep住喺低位徘徊。去到9點53分，見到指數同噚日開市時嘅走勢差唔多，都係二話不說地低開高走，只不過係高走嘅同時，上方50分鐘線(五分鐘圖10線)都同步向下搵條指數出嚟。
日線圖上，之前畫到有「上升通道」變成「平頂三角形」，但去到噚日下半場已經見到「平頂三角形」嘅底線都開始失失地。今日指數再跌，底線都可以確認失去，下方得返20天線作為期望支持，Slow STC(14,3)兩線高位向下行咗幾日，而指數又靠近牛證街貨，似乎集齊咗三個印花，方向明顯。
恒指熊(67071)，收回價22100點，同現價有逾400點距離，今日新上市，都有另一隻係同一收回價、行使價同槓桿差唔多(約36.15倍)，不過(67071)嘅換股比率係10000，另一隻係12500，敏感度高啲比較適合DT用。依家10點7分見五分鐘圖上指數受阻於50分鐘線兼保歷加通道口拓闊比位指數向下再落，可能要等下一Round，見指數喺五分鐘圖圖再受50分鐘線/100分鐘線(五分鐘圖20線)遇阻先至偷到位出場；安全嘅當然用返Slow STC(14,3)Swing Trade嘅做法，即係等Slow STC(14,3)上到超買位時先至出場。
有一個圖要小心嘅(當然可能都未必有影線嘅)，【下半Part】再講。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
