噚日揀咗隻恒指牛(63991)出嚟,喺朝早11點至11點10分,趁五分鐘圖上見Slow STC(14,3)落到超賣至嚴重超賣範圍出貨,平均買入價為0.042元。呢注貪心鬼係以日線圖博指數可以行到「小圓底」頸線位,都set好以小時圖跌穿10小時線(小時圖10線)就放棄。不過,噚日恒指喺小時圖上一直Keep住喺10小時線以上位置,呢注過唔過夜真係要睇你幾大注同敢唔敢啦,純綷個人唔鍾意過夜,又反正即使去到臨收市前沽貨嘅話,以最後15分鐘走貨時間計,(63991)高低位曾經做過0.053元/0.049元,平均沽貨價為0.0512元,平均賺幅都有九格/21.43%。食安寢安。
今朝終於見到下個太陽,再唔係起身嗰時見天陰陰,恒指開市都繼續造好,完U後升多30點,開市報22262點。不過,到正式開市之後,指數旋即高開低走,依家9點37分,恒指倒跌147點,做緊22084點。其實,以今朝恒指開市前見嘅牛熊證街貨圖,指數係相對靠近熊證街貨層,而熊證街貨量目測都知比牛證嘅多,熊證第一層22400至22499點已經有逾1300張期指嘅重貨區,How come咁都唔再向上行,反而向下方無咁多街貨嘅牛證「吮骨」呢?
依家10點正,指數愈落愈有,指數已經喺小時圖上確認失10 時線,而喺日線圖上見指數未到「小圓底」頸線出現回落,可幸嘅係10天線仍然保得住。不過,再過多4分鐘,恒指已經落到去牛證第一層街貨21900至21999點嘅範圍,再睇返小時圖,20小時線(小時線20線)嘅位置為21094點,同第一層牛證街貨嘅水尾(即21099點)差唔多,呢個位應該都隨時無埋。
既然小時圖上見指數都回落返去中軸位但暫時見停,就先觀察住呢個中軸位有無支持先啦,期結過後放日假回下氣都好合理嘅...
作者阿珊,任財經/投資版傳媒人十幾年,《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證,唔貪心,志在搵餐下午茶。