噚日揀咗隻恒指牛(56708)，喺大約噚日朝早10點40分至10點55分呢段時間觸及買入位，平均買入價為0.0575元。不過，噚日恒指喺下半場幾近橫行，所以喺【下半Part】Set咗以跌穿小時圖20小時線(小時圖20線)為止蝕為，去到收市前都未見呢個位穿過，(56708)難得的過咗夜，還好嘅，因為呢一注以小時圖至日線圖嚟Trade，就試試佢囉。
噚日收市之後去咗覆診，醫生同我睇返第N次嘅抽血報告，其實上一次已經話我甲亢指數回落返去正常水平，已經減咗藥，至今次指數都係處於合格範圍，不過三個指標裡面仲有一個未達標，同時話我嘅膽固醇有少少高(嘿...家族史好強架)，而我只係擔心嘅係申亢正常過後，體重會開始增加返，返到同以前一樣水平嘅都算，千祈唔好多過就得(幾廿歲你估減肥易)。
今朝早天氣還不錯，總好過早排又濕又落去，恒指今朝繼續暖和，開市報21771點，升86點，喺小時圖上見到指數剛好踩住20小時線，(56708)即時達標，但輪證係唔可以喺U盤時段進行交易，唯有等正式開市。
本以為今日開市後指數同過往日子都係咁上下，喺首五分鐘按住U盤時開出嘅方向火速行多兩步之後就會反方向咁行，但過去嘅都真係只能夠作為參考，今日指數開市之後，不消10分鐘就將第一層熊證21800至21899點全數街貨收回，呢度唔算多貨，只有相當於167張期指。當指數係咁上行嘅時侯，就愈是期待會見到轉勢嘅情況出現，可以即時反手捉轉角，但大前題就要放走隻(56708)先。
就以開市首15分鐘作為(56708)走貨時間計，期內高低位為0.082元/0.069元，平均沽貨價為0.0755元，呢趟過夜平均賺幅有31.3%，過夜嚟講算是合格偏中上，比起我嘅甲亢指數/膽固醇指數還要好。
望望月曆，聽日就係期指結算日，仲要係今年第一季度嘅結算，慣例(係慣例)大市都會做番好少少，日線圖上見指數有20天線支持下，今日彈返高上去，10天線今日升穿20天線，短期「黃金交叉」訊號出現，Slow STC(14,3)兩線雖然上到超買範圍，但未見明顯下行勢頭，「再出好倉捉期結做好？」下晝睇下點先啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
