上個星期五(3月25日)隻恒指熊(68711)，不消一個鐘平均賺幅為13.05%；下半場見指數愈跌愈有咁款，不過朝早都做咗一轉，下晝Happy Friday就算。
噚日半夜廳到行雷落雨，出房門睇下我家肥貓有無被行雷聲嚇親，結果佢應該係被我忽然喺房行出嚟嚇親多啲。可能噚晚被嚇一嚇嘅關係，今朝不如平常般同我晨咁早起身，瞓到依家9點29分，恒指完U後開市微升17點，報24122點，不過，喺開市之後五分鐘圖上見指數出現一支「大陰燭」向下跌逾過百點，貫穿整條保歷加通道。嚟到依家9點53分，指數保持下行，而保歷加通道口都已經拓闊，暫時低位見21202點，稍為跌穿日線圖上嘅20天線(約21209點)。
不過，指數都只係失20天線少少，嚴格嚟講佢唔算係失守20天線，而喺五分鐘圖上亦見指數喺21202點/20203點出現爭一點嘅「平底」之後向上回升，借埋今日美團(03690)升逾8%(暫時10點8分見到)一把，喺五分鐘圖上恒指現經出現「圓底」反彈兼上破埋250分鐘線(五分鐘圖50線)，可惜指數實在行得太快，呢頭上破嗰頭再到第二個阻力位(500分鐘線，五分鐘圖100線)，仲要行出「射擊之星」嘅樣出嚟。奈何喺小時圖同樣都見到指數雖有50小時線(小時圖50線)做支持，但同時間頭頂都有10小時線(小時圖10線)同150小時線(小時圖150線)。
作戰室會做一啲好快嘅動作，但【輪證贏家】唔會，對比過小時圖同日線圖之後，基本上唔計日線圖上Slow STC(14,3)兩線高位回落有可能出現Swing Trade走勢的話，其實呢兩個時間圖都見指數係有踩穩再上嘅可能。「咁用小時圖/日線圖做好倉咪得囉？」的確係嘅，但再開埋恒指牛熊證街貨圖的話，就真係有啲猶疑。
今日返嚟見牛熊證街貨圖，熊證最貼價層為21900至21999點，新增街貨且唔係好多貨嘅關係，所以只得相當於38張期指街貨。牛證最貼價則為21200至21299點，800張期指街貨已經係最多新增同重貨區，反映資金認為3月中旬時恒指大跌已經係終極一跌，齊齊買牛博指數再上。而牛熊街貨中間位為21599.5點，同依家10點25分恒指做緊21561點都差唔多。
指數企喺牛熊證街貨中間位，真麻煩。本來想以小時圖確認上破埋10小時線/150小時線而出好倉，用小時圖嚟博Slow STC(14,3)出現Swing Trade上返去，但望望鐘，依家10點34分...咁啦，小時圖上見指數確認上破得到10小時線/150小時線，恒指牛(56708)先至出動啦。收回價21100點，同現價有500點差距屬於安全，逾約40倍槓桿都夠DT用。
定律呢啲嘢，都真係唔係話破就破嘅。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
