騰訊(00700)績前誇誇群果然勵害，上午唔郁下晝先嚟郁，仲搶到恒指升逾500點，不過噚日隻熊亦都無出到，一來朝早觸及唔到出市位，二來下晝見到佢咁上法，仲敢出咩！錢多留嚟買餅仔比我家肥貓食好過啦(呢排佢又嫌棄啲罐罐，已經餐餐唔同牌子唔同口味(*´д｀)o)
今朝起身望望街，終於見到對面幢樓，不過無啦啦開始落起雨，仲幾密，不過恒指今早似乎繼續回暖，恒指完U後升199點，終於重上22000點樓上，開市報22088點，第一層熊證21900至21999點全數直接送走，而22000至22099點嗰900幾張期指，其實已經係重貨區，亦都變成最貼價嘅一層，隨時呢層喺朝早都無埋。
睇返恒指日線圖，以收價計噚日指數都已經上返20天線，今日再上無乜意外，但原來指數已經補咗3月7日嘅下跌裂(21327點至21839點)，而今日開市呢口價，都踩入咗3月4日嗰下跌裂口(22017點至22378點)，幾時補到就唔知，只係知道補完呢個之後，仲有三個下跌裂口喺度，分別係2月24日(22376點至23500點)、2月22日(23813點至23998點)同埋2月21日(24231點至24284點)。當然，反過來都有一個大型上升裂口睇下指數想點，就係上個星期四(3月17日)(20120點至20786點)。
早排係咁出淡倉，純綷係因為指數擺位近牛證街貨之餘，最貼價嘅熊證閒閒地都有800至1000點嘅差距，任發行商點出貨快都唔夠大市向下斬落去斬得快。但如今風水輪流轉，今日最貼價嘅牛證街貨為21200至21299點，以恒指開市價計嘅話，都有成800點距離。
依家9點51分，喺五分鐘圖上見到指數裂口高開之後有稍稍向下回落，但50分鐘線(五分鐘圖10線)都未到，指數喺22000點附近踩空再上，未幾，22000至22099點嘅熊證都已經死埋，而再對上嘅熊證其實唔係無街貨，每層都有幾百張期指喺度，尚算平均，而22300至22399點嗰483張期指街貨已經變成新嘅重貨層。
嚟到10點2分，暫時恒指高位見過22199點，爭少少可以再殺多一層街貨，但小時圖保歷加通道口拓闊嘅走勢似乎啱啱開始咗無耐，而Slow STC(14,3)兩線只係上返去超買範圍，仲未見超買再超買，如果今鋪用小時圖做Trade，似乎諗得過，恒指熊(55203)，收回價21450點，市場上第二貼價牛證，但槓桿為全場最高，有約34.36倍，用嚟DT最好，萬一有咩事嘅話，都可能爬到幾格。
唯一風險係11點嗰疫情記者會...
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
