美國聯儲局議息，一如預期加息0.25厘，道指因此一度下跌，但其後V形反彈，美股三大指數倒升收市，納指更升逾3%。至於中概股，國務院金融穩定發展委員會已召開專題會議，會上提到目前中美雙方監管機構保持了良好溝通，已取得積極進展，正在致力於形成具體合作方案，消息刺激中概股報復式反彈。港股噚日勁升1672點後，夜期跟ADR時段再升逾千點，今日當然裂口高開。
恒指高開1343點，成功收復10天線(20473)，見21471半日高位後，即有短線獲利沽盤湧現食糊，令恒指升幅一度收窄至699點，見20786半日低位。不過低位又見買盤支持，大市重拾動力，半日仍保持逾千點升幅，收報21250，升1163點；國指升432點，報7321；恒科指半日升309點，收4552。半日上升股份超過八成，升勢頗為全面，半日成交額增至1766.12億元。
藍籌股只有吉利(00175)跟信義光能(00968)半日倒跌，分別跌0.7%及1.4%，其他藍籌股全面向好。大笨象(00005)跟友邦(01299)半日分別升4.7%及5.3%。藥明生物(02269)半日升近17%，但都未係升幅最大藍籌股；其他藍籌股閒閒地升半成以上。
科網股呢兩日嘅反彈力度，完全係超乎常態，噚日大部份重磅股份，至少升一兩成，升夠三成嘅比比皆是，今日升勢持續，ATMXJ之中，又係京東(09618)最神勇，噚日升完三成幾，今日再下一城，升足一成。阿里(09988)今日都唔錯, 升一成，上返紅底。騰訊(00700)亦升多半成，美團(03690)再升11.7%，小米(01810)就無乜本事，半日僅升3.1%，14至15蚊阻力唔細。其他科網股閒閒地升半成以上，最誇張係明源雲(00909)半日狂升超過五成，係表現最好恒科指成份股。
內房跟物管股今日亦錄得可觀升勢，主要係財政部表示，今年內不具備擴大房地產稅改革試點城市嘅條件，碧服(06098)半日爆升近26%，為藍籌股中升幅之冠。其他內房跟物管股延續噚日勁彈之勢，最誇張係融創(01918)半日勁升四成幾，有線人話早兩日融創插水，貨源已入強者手，呢啲阿Man就真係唔識玩，反而揀咗隻財務狀況穩健好多嘅碧桂園(02007)，半日再升逾兩成，至少穩陣過啲屢傳財務不穩嘅內房。
阿Man都講咗前日大成交落到18200左右似見咗短期底，連續兩日大成交兼急升共三千點過外，港股成功上返條10天線，暫時可以脫險，只係今日遺下巨大下跌裂口，可能需要時間整固一下，先有力再挑戰22000水平，亦即係20天線附近。
麥狄文
(徐狄怡‧證監會持牌人)
