市場已接受美國聯儲局自2018年以嚟首次加息，加上憧憬俄烏談判有望達成停火協議，油價大幅回落，美股隔晚三大指數反彈，不過A股個別發展，限制咗港股反彈，恒指一度升逾600點後掉頭，升幅曾收窄至不足200點。恒指隔晚喺夜期跟ADR，已率先跟隨美股反彈，早段高開540點，半日最多升升660點，見19075點半日高位，可惜A股一度倒跌，拖累港股升幅收窄至168點，見18584點半日低位，其後買盤支持下，升勢回勇。半日恒指報收報18875，升460點；國指收6319，升195點；恒科技半日反彈6%，升210點，報3683。半日成交額1115.7億元，尚算配合升勢。
藍籌股普遍造好，只有銀行股逆市向下，大笨象(00005)半日跌0.7%；建行(00939)跟工行(01398)亦分別跌1.6%及0.7%。ATMXJ五大科技巨頭反彈，當中以京東(09618)半日升13.1%最好力，成為半日表現最勇藍籌股。騰訊(00700)跟美團(03690)齊齊彈7.5%；阿里(09988)跟小米(01810)則分別升近6%及4.2%。隔晚中概股喺美股亦見反彈，今日相關股份普遍錄得超過半成升幅。
汽車股亦見反彈，比亞迪(01211)上調車價最多6000元人仔，股價半日升6.8%，不過180元未能企穩，反彈之路仍然難行。其他汽車股以理想汽車(02015)半日彈15.1%最勁，不過彈得急係因為跌得深，理想不足一個星期失去紅底股身後急挫三成，今日彈返15%都仲未有耐回復三位數股價。其他汽車股則升超過3%至接近一成不等。
咪以為個市彈就個個板塊有得升，內房股跟物管股持續疲弱，碧桂園(02007)叫做係財務狀況穩定嘅內房股，可惜民企身份嘅佢遭嫌棄，半日再跌7.7%，一眾藍籌股中跑第尾。融創(01918)遭惠譽將評級下調至「B-」，半日大跌17.7%；同系融創服務(01516)也大跌8.9%。融創跌到咁都未叫最傷，佳兆業美好(02168)發盈警，料去年盈利減少，股價半日跌逾兩成，盈警都未係致命傷，其母公司係佳兆業(01638) 令人擔憂嘅財務狀況，先係致命原因。其他物管股普遍向下，閒閒地跌半成以上，不過具央企背景嘅萬象生活(01209)則升一成。而央企國企背景嘅華潤置地(01109)、中海外(00688)跟中海物業(02669)半日則隨大市回升。
噚日阿Man話港股未見底，但當日午後大市殺逾千點落到18200水平，喘定後今日反彈，加上恒指一個月累計已跌咗6000點，幾乎係恒指全年波幅，暫時可以假設短期喺18200見咗底。以6000點累計跌幅計算反彈黃金比0.382，即係呢一次反彈有望可以上到20500水平。不過由於市底仍然弱，反彈將會較為拖泥帶水，可能以行三步褪兩步嘅矮仔上樓梯方式龜速前進。
麥狄文
(徐狄怡‧證監會持牌人)
