噚日做好兩手準備呀，不過兩邊都觸及唔到入貨位，所以最後又係得個吉，唔緊要，學阿信話齋：機會係係留比有信念嘅人，相信自己操盤策略，遵守策略定落嚟嘅方針，總會成功。
依家9點21分，恒指完U見升90點開市，上返去22400點樓上嘅位置，講真，指數跌咗咁多日，假使要再向下殺落去嘅話，大回小漲點都比一下轟落去嚟得健康同長跌長有，唔見小回，就唔難以引到更多資金入好倉好嗰邊，咁每次向下轟嘅時侯，殺好倉街貨嘅期指就會少咗，相對成本增加，唔化算。所以今日指數彈升，到依家9點42分，指數升幅略為擴大至逾百點之後，可能引咗啲即市好倉落場，佢就開始回，有理無理，先打咗一巴先。
不過，今朝作戰室到依家9點56分都未有動作，只係知道有啲戰友噚晚有出好倉過夜，所以先處理好過夜博食裂口呢注先。睇日線圖見到恒指個走勢開始應該要跌停一陣，日線圖上見截到依家10時11分止似有「身懷六甲」嘅走勢，Slow STC(14,3)一早喺嚴重超賣水平位置度等緊觸底反彈咁款，而牛熊證街貨圖都見開始配合，事關今日見到熊證有新增街貨層至22700至22799點，而今日新上市嘅、最貼價嘅熊證，收回價都落到22400點至22499點呢一層，雖然個量未必好多，但已經將過去指數貼近牛證，同熊證有700、800點，甚至過千點距離嘅情況有所改變。
技術分析同街貨開始同步時，就係市場有出現轉向嘅契機；更重要嘅係，噚晚我同我家老爺玩緊花札時，見到青姐上大台睇經節目拎咗個圖出嚟：月線圖+200月線(唔係我自己搵到嘅圖梗係要比返credit人哋啦)，炒輪嘅真係好少拎個月線圖出嚟，一見呢個圖見到恒指喺過去咁多年一遇到啲「大時代」嘅日子，如97年亞洲金融風暴、03年沙士、08金融海嘯等，都靠呢條200月線去頂住，而目前見指數稍稍向下失呢條線，但還可以嘅，只要唔係好明顯跌穿或失守嘅話，呢條歷史悠久嘅200月線都仲可以守護恒指。
恒指Call(20442)，收回價23000點，同現價有約2.45%價外，7月到期我唔係一注揸到尾，一到價內就換碼，希望呢條200月線有強大支持啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
