隔晚美股先跌後反彈回升，三大指數又坐一輪過山車，今日港股隨隔晚美股表現而反彈高開，可惜喺23000遇阻力，港股又回復跌勢，恒指盤中更跌逾百點，因為美期又再回復跌勢，主要係俄烏局勢仍然緊張。港股今早反覆偏軟，二萬三關得而復得。恒指高開6點後，一度升145點，見23046，可惜美股期貨再度受壓，23000再失守，恒指一度跌跌160點，見半日低位22741，其後跌勢放緩。恒指半日跌35點，報收22866；國指則升2點。報8033；恒科指半升74點，報收5143。
藍籌股中，以銀行股表現較差，尤其係基地喺英國嘅大笨象(00005)跟渣打(02888)，半日分別跌3.1%及3.5%。主要係有歐洲央行鷹派官員認為，俄羅斯入侵烏克蘭，可能導致歐央行放緩實施撤銷量化寬鬆措施，當利息唔再急速向上，本來支持呢啲股份上升嘅理由唔再充份，咁佢哋之前又升咗咁多，回返啲都好正常。其他本地銀行股則個別發展，恒生(00011)跟中銀香港(02388)分別跌0.7%及2.1%；大新銀行(02356)微升0.3%；東亞(00023)升0.8%。
Tesla 噚晚股價亦表現反覆，有報道指公司計劃喺上海建新工廠將產能提高，相關概念股有資金流入，贛鋒鋰業(01772)升3.6%；比亞迪(01211)升2.4%；力勁(00558)抽高7.9%；GX中國電車(02845)升2.9%；連帶小鵬(09868)跟理想(02015)也分別升5.9%和4%。
Covid-19口服藥面世，全球皆有意搶購使用，令資金對生科股嘅熱情再現，香港上市生物科技指數急升3%，龍頭藥明生物(02699)跟信達生物(01801)半日分別升5.8%及7.5%，其他相關股份普遍錄得半成以上升幅。不過呢個板塊之前已跌到重傷其至內傷，目前只能視為反彈，真正擺脫弱勢轉強言之尚早。
今日期指結算日，又撞啱係星期五，港股急跌逾二千點後，今日反彈亦顯得無能，除咗成交唔夠缺水之外，俄烏局勢令避險情緒高漲，缸邊友唔想入場冒險亦係正常。港股暫時仍未脫險，恒指至少要企穩23000並重上23500嘅頸線之上，港股方能走出困局。
麥狄文
(徐狄怡‧證監會持牌人)
