噚日見到恒指「休克式」直落，出淡倉到尾真係腦輕鬆；不過，其實都有少量(係極少量)讀者有問過我關於美股指數窩輪嘅玩法，心態都離不開係想以Put嚟捕捉呢期美指期貨喺亞洲時段嘅跌勢。坦白講，你哋可以諗到呢一個位嚟玩，都唔係你哋口中第一句同我講：「你好！我係新手有啲嘢想問」咁簡單啦。
正如噚晚喺電台節目裡所講，唔一定係捉美指期貨喺亞洲市段嘅跌勢，其實現今新一代嘅投資者，喺佢哋個倉裡面都已經唔會只有單一港股嘅股份喺裡面，總會有啲美股，更成熟嘅會有台股，甚至日股，先唔講日台兩股，美股比較比人會持有，但呢期晚晚見到美股市場係咁冧，自己除咗食粒安眠藥之外，仲可以做得啲乜？進取嘅、有財力嘅，可能開始美指期貨戶口，直接沽落去，「喂！香港玩期指都已經唔平，仲要捱眼瞓嚟玩美股個期指，唔好啦，WFH都要做架！」So，美指輪就係呢個時候幫到你。
的確呢單嘢好似保藥黨、瑞士山區肺咁，但事實係喺港股交易時段你係可以美指輪，唔單止追佢喺亞洲時段下行嘅跌勢，同時仲可以幫自己夜晚嗰堆滿缸紅嘅美股做對沖，更加唔駛捱眼瞓，方法簡單，入場費一定比你玩期指低，一個咁好嘅產品，點解唔考慮一下？
杜工購(10372)，行使價36050點，今年9月中到期，新上市貨仔唔怕街貨多；杜工沽(10321)，行使價32350點，6月中到期，低引伸、高槓桿。
望望月曆，原來今日已經係25號，下個星期一28號係2月最後一日，唔怪之得噚日Content Partnar妹妹問我交Invoice啦，完全零意慾，仲要心諗：做乜咁快催我交單？期結日之下恒指完U後開市微升6點，到依家9點37分，都唔駛等咁耐，指數一開市就已經向上衝高多百幾點，其後再稍為回返少少，事實上今日恒指波幅理應無噚日咁大，因為見到恒指波幅指數(VHSI)都有所回落，不過，有啲嘢係大家都唔會估到，尤其是依家烏俄打緊仗，真係再嚟多個導彈打落去唔知邊個重要地方或要據的話，全球股市同指數期貨再冧過都似。
圖表上出好倉的確係可以博指數見技術反彈，但事實上目前指數靠近牛證街貨，向下再殺亦無可厚非，作戰裡今早第一注係出好倉，唔單止係博見技術反彈，仲博今日期結會做得好好睇睇，以指數仲踩得住保歷加上升通道為持貨原因，揀咗隻都比較進，今朝揀嗰時同現價有300幾點差距，依家變咗有400幾點啦；恒指熊(69320)，收回價22648點，同現價有逾330點差距，約60倍槓桿係即日做Trade用嘅，目前計指數五分鐘圖保歷加通道仍然橫行中，進取嘅吼指數落到中軸位時見支持先至出手；安全嘅用返一如以往嘅方法，就係等Slow STC(14,3)落返去超賣區先啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
