噚日揀咗隻恒指熊(61482)出嚟，落場位都已經度好晒幾時出場，但等咗好耐恒指都係喺五分鐘圖沿住佢個「長方形」橫行，直至噚日點半左右，忽然向下插落去，心諗：一早出到嘅話咪可以呢個位爬到格仔囉(而作戰室裡頭都有戰友喺呢一插之中爬到10格返嚟架)。急插過後指數回穩，同步見Slow STC(14,3)都慢慢上返去，去到2點55分，終於都見到五分鐘圖醒嘅Slow STC(14.3)上返去80以上嘅超買水平，而呢個超買仲歷時咗15分鐘，去到3點10分為止，呢個鐘數出隻(61482)都真係有預咗過夜情況出現，每逢過夜注碼上都要留意一下，學誠哥話齋一定要量力而為 。
按噚日(61482)喺2點55分至3點10分，高低位做過0.082元/0.078元計，平均買入價為0.08元，其實如果呢注過夜，以人貨後至恒指收市前Slow STC(14.3)最低都只係做到去2x計，基本上都未算係超賣水平，硬走係可以，以噚日臨收市前15分鐘走隻(61482)嘅話，按當時(61482)高低位做過0.085元/0.079元計，平均走貨價為0.082元，都叫做有兩格落袋嘅。唔心足過夜諗住博一 博嘅話，今朝開市再大裂口向下跌多400幾點，(61482)衝到上成毫子樓上，就算係頭10分鐘拿拿聲走貨計，高低位做過0.142元/0.121元計，平均韭菜價為0.1315元，勁執逾50格或64.38%，唔係多謝我，係多謝普京。
今日雖然有返雙位數字嘅溫度，但仍然都係「寒冰掌」，手指接近僵硬嘅狀態打稿係好高難度嘅動作，唔打錯字已經控制得好好。依家10點5分，恒指低開後稍回再落過，連23600點都無埋，換言之指數目前已經斬咗牛證頭四隻手指，呢度夾埋有相當於2786張期指，咁早食到咁飽，班大戶應該暖笠笠；作戰室裡面都唔差，一早開淡倉追，不消半個鐘就有戰友話食咗12格熊仔，都唔算係太差。
再嚟10點19分，喺五分鐘圖上見到指數下行速度開始減慢，而50分鐘線(五分鐘圖10線)開始同指數靠近返，雖然唔知之後會唔會又生個「長方形」出嚟行到下半場某一個位「叮」一聲瞓醒，但以目前情況見，淡倉仍在手都係博50分鐘線做成阻力，再將指數向下打落去。
By the way，其實日線圖上乜天線都失晒，依家指數都企住喺保歷加通道底線之上，而保歷加通道口拓闊中，出Put以日線做淡再向下殺熊實屬合理，只係留意呢期開始業績期，隨時指數被藍籌業績靚仔而借機衝返上去。恒指Put(23955)，行使價23000點，同現價有約2.57%價外，中期、引伸及槓桿適中，同噚日一樣試下用五分鐘圖等返條Slow STC(14,3)上返超買水平先至落場。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
