噚日就情人節，今日就元宵，見到FB好多朋友放閃，分享點同另一半去慶祝。我同我家老爺向來都係簡簡單單，無花無禮物，如常的兩丁友同一隻貓喺屋企渡過，因為對我嚟講咁樣已經係最大嘅幸福。但係我比較期待聽日多啲，因為新十五過後終於可以拆利是啦！可能你已經一早拆晒仲洗埋，但我家老爺就係咁傳統，點都要過新十五先拆得，是但啦，反正都唔會多得去邊。
恒指今朝開市仍然見到跌勢，開市跌98點，落返去2445X點呢啲位置，喺五分鐘圖上見到Slow STC(14,3)兩線於中軸位勢頭向下。不過，喺日線圖上就見到指數同10、20和100天線相當接近，遇上呢個三線匯聚位不得止，再睇埋小時圖見指數有100小時線作勢支持，搞到作戰室今朝都唔敢太貿然出倉，就算出淡倉再追指數向下，都係爬格仔、以快打慢形式去做。「但恒指現水平近下方牛證街貨喎，唔係應該順住向下而殺架咩？」咁其實佢都可以嫌街貨未夠多唔殺住嘅，你估推郁條恒指唔駛成本咩。
依家9點53分，恒指喺低位來來回回之後，跌幅終於見明顯收窄，依家只係跌緊28點，做緊24528點，五分鐘圖上見指數低開高走，仲已經上破埋保歷加中軸，不過，保歷加通道口暫時又未見拓闊，呢啲位出好倉再追指數再上的話，隨時不消兩個會合指數又到保歷加通道頂遇阻回落，咁就真係左一巴，右一巴啦。
噚晚喺電台都有提過一隻冷冷地嘅嘢，就係SPDR金ETF(02840)，原因好簡單，呢期國際頭版都係烏克蘭同俄羅斯嘅政局問題，美國(好似)出嚟做和事佬但唔成功，兩邊都喺邊境Set好晒個陣，只係爭「Fire」嗰一下，咁嘅環境有乜可能啲止唔飆到咁勁？SPDR金ETF有Call嘅，都有讀者喺FB留言話買金粒，其實投資黃金嘅方法有好多種，永遠呢啲都係揀最合適自己嘅就可以架啦。
睇返個市，嚟到10點6分，小時圖出多一粒燭，見指數於100小時線確實有初步支持，日線圖上三線匯聚唔駛講，只係行到依家恒指都只係倒升咗1點，睇嚟今日DT有難度，都已經喺作戰室講咗架啦，就係出隻Call博日線圖三線滙聚有支持。恒指Call(16233)，行使價24600點，同現價只得0.6%價外，12.68倍槓桿隨時變返做DT都得，入市位一如以往用返五分鐘圖見Slow STC(14,3)落返去超賣水平時先至進場。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
