早排放緊農曆新年假期嘅時侯，同我家老爺無嘢做喺屋企搵嘢睇，最後我家老爺揀咗一套卡通片睇，去到最尾女主角為保「網絡世界和平」，同AI壞人以日本其中一個好傳統嘅玩意決一高下，呢個玩意叫做「花札」(都有人叫花牌)，其實韓國都有(之前睇過唔知邊套韓劇，其中一幕係一班老人家圍爐坐底咁玩)，嗰時都心思思想學，再被套卡通片勾起條根，我只係上網睇咗條youtube教學，再download埋個app就開始學玩。我家老爺見我呢兩日成Q日對住個電話「來來！」，於是叫我買副實物返嚟，教佢玩。學多樣嘢都好嘅，如果唔係老咗嘅話兩條友只係識得捉波子棋就無癮啦。
噚日下半場揀咗隻恒指牛(50965)出嚟，但講明喺恒指五分鐘圖上如果見到指數可以企得住100分鐘線(五分鐘圖20線)再上的話先至偷位小注落場。可惜以另一地方噚日出文時間計，指數再考驗條100分鐘線失敗，還好保歷加通道無乜點拓闊(因為下半場真係好鬼悶)，所以恒指全日都仲可以保持住升勢，只係(50965)落唔到場咁解。
今朝起身發現上唔到網，真係世界末日，慘無人道。打電話去供應商嗰邊問，原來機樓死咗，而今日都有唔少熊證死亡，事關恒指完U後開市報25000點樓上，首兩層熊證街貨死亡之餘，指數踩埋入熊證重貨區，而呢度有相當於838張期指；本以為指數再上埋嗰50點會全層殺晒呢層熊證，不過指數開市後即見高開低走，將25000至25099點拆開以50點為一層街貨睇的話，發現原來大部份嘅街貨都集中於25000至25049點呢一part，怪不得指數𡁻完鬆啦。
依家9點46分，恒指升幅已經大為收窄7點，報24837點。睇埋日線圖見到指數今日裂口彈高之後，原來上到接近150天線，呢個位暫時計怕且都會成為阻力。不過，喺五分鐘圖上見到指數高開低走後，依家9點50分，恒指已經回落返去保歷加通道中軸位置，而保歷加通道暫時都仲只係見到橫行嘅情況，都真係要首要留意住指數落到呢個位會唔會有平均線可以做到五分鐘圖上嘅即市支持，先再決定出好倉追返上面嗰堆仲未殺死嘅熊證啦。
恒指牛(50606)，收回價24500點，同現價有約430點差距，逾50倍槓桿夠做DT，一如以往，用返Slow STC(14,3)落到超賣時出手博出Swing Trade。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
