美股隔晚啲科技股跌到一仆一碌，拖累三大指數下跌，納指更創自2020年9月以嚟最大跌幅，幸而亞馬遜收市後派成績表，錄得佳績，股價盤後飈升15%，帶動港股虎年首個交易日紅盤高開，雖然早段一度升幅收窄，但其後升幅再次擴大，半日以接近高位收市。恒指高開590點報24392，其後升幅一度收窄至338點，見24140半日低位。其後再度回勇，最多升673點，見24475半日高位，但未能成功企穩100日線(24472)。半日恒指收報24447，升645點；國指報收8535，升185點，恒科指半日收5540，升123點。北水仍未回歸，半日成交額641.77億元，呢個成交額其實未配合到升幅。
藍籌股只有三隻下跌，包括新奧能源(02688)、龍湖(00960)跟萬洲(00288)，半日分別跌0.4%、0.5%及1.5%。其他藍籌升幅不俗，金融股表現最好，重磅友邦(01299)半日升4.8%，英倫銀行再加息0.25厘，大笨象(00005)再得到高盛加持，提高目標價至68元，推動其股價半日升4.6%。渣打(02888)半日升近半成，恒生(00011)升3.1%；其他本地銀行升幅由2.5%至5%。
比亞迪(01211)上月汽車銷售多1.2倍，股價半日升6.3%，其他汽車股普遍上升，當中以理想汽車(02015)半日升12.4%最勁，公司亦宣布上月汽車銷售大增近1.3%，成績較比亞迪更佳。
不過醫藥股表現好壞參半，龍頭藥明生物(02699)有反彈，不過信達生物(01801)半日跌5%；康寧醫院(02120)半日更大跌近28%，主要係換咗個核數師，令市場亦佢投不信任票，股價已連跌6日。
總結今個虎年都算有個好開始，恒指成功突破多條移動平均線，雖然美股近日表現波動，但港股市底尚算硬淨，只要仍然穩守24000關，後市可睇高一線，下周北水回歸，未知會否助一臂之力。記得牛年大市農曆年假後處於高位，北水回歸後未見幫手掃貨，反而趁高出貨，狠掟高估值股份，其後港股測展開一年跌浪。不過經過一年監管整頓，唔少股份估值已回復合理，甚至超值水平，估計去年北水回歸後狠狠掟貨嘅情況唔會再重演，2月份港股仍可睇高一線，首目標係重上25000水平，祝願今個虎年，虎進金來，中港股市虎虎生財。
麥狄文
(徐狄怡‧證監會持牌人)
