臨近新年，本來老媽一早講咗去酒樓食，咪要要佢煮，不過依家Omicron已經殺到埋身，酒樓一早無晚市，唯有叫外賣返嚟啦。向來我個人對盤菜係麻麻地，事關次次食親都覺得無論你食緊乜都好，嗰舊嘢都係同一個味，或者個原意係一大兜盤菜十幾個人食，只係食氣氛；it doesn’t matter，反正我又唔係要賣護髮產品，同班戰友食飯老茶就OK，貼地嘢啱我多啲，基隆盤菜絕對係其中一個選擇(it is not an AD)。
手上仍然有兩隻淡倉，一隻恒指Put(13090)同埋隻滙控(00005)Put(22160)。前者大膽啲，以日線圖嘅20天線或50天線做下望目標；至於後者就繼續以日線圖嘅20天線為下望目標。
本來今朝起身見到美股噚晚又見紅，兼且恒指五分鐘圖上見噚日條Slow STC(14,3)上到超買 至嚴重超買水平後，今日有機會向下回返落嚟，但結果開市見指數升99點，報24342點。不過唔驚，唔係因為信政府，而係真係見到技術分析走勢嚟計，就算係高開都好大機會係低走，咁到時趁機沽走啲Put先。坦白講，如噚晚喺電台所講，呢個星期嘅部署就係將手上嘅貨沽晒佢，或者最多下個星期一(1月31日)半日市裡面搵隻好倉過新年，博年初四(2月4日)開紅盤；咁長嘅假期仲要無北水咁耐，玩X咩。
依家9點55分，恒指只係頭嗰幾分鐘，依家指數有升幅擴大嘅情況，之前set好咗兩隻Put嘅走貨目標價，不如都set定個止蝕位先穩陣。恒指繼續用返日線圖，以上破10天線為(13090)嘅走貨位；至於隻(22160)，同樣都以日線圖嘅10天線為走貨位。其實依家見到兩者都同呢個走貨位好近，截至依家10點2分止，前者高位爭2點，而後者高位都只係爭一格，真係隨時走人。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
