上個星期臨尾仲有一個鐘先收市，我就落咗診所打人生第一針，無計，都真係拖到呢一刻先嚟打，婆婆為咗去飲茶、見孫仔捱咗一針，咁大前題都要孫仔可入到酒樓先得架；重點係姑娘同我講：同孫仔飲茶先要嘅，孫女咪唔駛囉！果然真‧醫護。
今朝恒指完U見跌272點，報24693點。本以為以恒指上個星期五(1月21日)收市價計咁近上方熊證，點都會死追埋上去殺埋堆熊證先過年啦，又無喎，反而向下回落。依家9點44分，喺五分鐘圖上見恒指今朝第一支燭出「錘頭」之後推返指數向上，依家仲爬返上1250分鐘線(五分鐘圖150分鐘線)，不過Slow STC(14,3)兩線由開市到依家都係向下，都已經喺聊天室收大家要小心指數同Slow STC(14,3)會行出「背馳」走勢。去到9點51分，見到指數再次受制於1250分鐘線，而今朝喺作戰室同大家講可以講淡倉先追返Slow STC(14,3)落返去超賣，希望可以啦。
又望下隻滙控(00005)，今朝恒指低開，滙控股價都見下行，只係去到依家9點54分，滙控股價見低開高走咁解，而隻Put(22014)證價做緊0.265，如果真係繼續以日線圖20天線為目標的話，喺時侯都要換一換第二隻Put啦，當然唔係因為(22014)價內(佢行使價係47.83元)，而係因為佢證價高過0.25，咁變相之後每跳動一格由之前嘅0.01元變成0.05元，對佢之後嘅彈跳力係有影響。以依家10點鐘沽走隻(22014)，以0.265元計，呢趟平均賺幅為21.8%；之後再換上隻(22160)，行使價45元，低引伸、槓桿偏高，同以10點計算買入價的話，平均買入價為0.17元。
依家10點9分，恒指做緊24671點，跌293點，喺五分鐘圖上見50分鐘線(五分鐘圖10線)終於都向下回落到指數附近，今朝喺作戰室開淡倉嘅捱到依家呢一刻又可以再次放心過，直線向下等到Slow STC(14,3)兩線回落到超賣為止，咁第一注嘅淡倉就可以收工。
坦白講，喺小時圖上見指數今朝都力守20小時線(小時圖20線)，不過小時圖同日線圖都見到Slow STC(14,3)兩線處於超買水平有作勢下行嘅情況，雖則熊證第二層25000至25099點為重貨區，但第一層牛證24200至24299點都有過千張期指街貨亦不容忽視。恒指Put(13090)，行使價24700點，為市場最貼價的價外Put，4月28日到期有排啦，時間值損秏有限，逾10倍槓桿都唔算太差。比較期待今日小時圖可能失守20小時線，同以小時圖上破10小時線(小時圖10線)為止蝕/落場失效位。
近排期實都收到唔少讀者問：作戰室永久八折嗰一個會員級別可唔可以再開多幾個呀？好啦，就當係農曆新年感謝祭，開多五個新嘅位置比大家，直至新十五，手快有，手慢無呀！(不過都提提你，Patreon會喺每個月1號收取會員費用，所以奉勸你等到2月頭先入嚟最好，免得1月得番呢個星期又無啦啦被Patreon收多一個月啦。)
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
