隔晚美股假期，本來港股應該無乜方向，靜靜地整固一下，點知美國10年期債息創兩年高位，升至1.85厘之上，納指期貨跌逾200點，港股今早高開低走，反覆偏軟。恒指今早高開56點，見24274，半日最多升167點，見24385半日高位。但在美債息抽高下，港股倒跌72點，見24145半日低位，其後喘定。半日恒指收報24183，跌34點；國指報8481，升17點；恒科指半日升25點，報5749。半日成交636億，都係悶局一場。
藍籌股大笨象(00005)連升七個交易日後，今日回吐，半日低0.3%；友邦(01299)半日亦跌1.3%，其他內銀股跟內險股稍作回吐，但回吐壓力好溫和，相對之前累計升幅只係濕濕碎。科網股各自發展，ATMXJ升跌參半，騰訊(00700)跟阿里(09988)分別跌1.2%及0.3%，但美團(03690)、京東(09618)跟小米(01810)保持上升，但美團跟京東升幅收窄咗好多，小心下半場保持唔到升勢。
內房股今日反彈，喺整個內房債務危機之中，碧桂園(02007)一直透過收購同業以顯示其財務能力，今日再購回兩筆優先票據，股價半日升6.3%，係表現最佳藍籌股。其他內房股跟炒，普遍錄得2%以上升幅。不過都係嗰句，內房股仍然地雷處處，真係有心儲貨，都係捕住潤地(01109)跟中海外(00688)，呢啲國企及央企背景嘅內房，又或者碧桂園跟龍湖(00960)呢啲龍頭股，其他次一線嘅內房股，暫時都係唔使諗。
國家發改委經濟運行調節局局長李雲卿預計，今年用電量及最高用電負荷仍將較快增長，電力股炒上。電力股自從去年下半年炒上後，上月開始已見高位整固回吐，暫時進入炒上落階段，即係升嗰日就無謂追，回到見到支持位，咪買啲博炒上落，家陣都係咁做。基建股今日亦有資金捧場，基建鐵路三寶，中鐡(00390)、中鐵建(01186)跟中交建(01800)分別升1.8至4.9%。
噚日阿Man叫住唔好高追濠賭股，今日呢個板塊全線回吐，不過回吐幅度唔算多。至於呢啲位仲買唔買，雖然續牌條件明朗化，消除之前續牌疑慮，但噚日嘅升幅已反映呢個因素，即係濠賭股要再升，都係睇返基本面，一日未通關，博彩收入未有耐恢復元氣，睇嚟都係咁上下，梗係唔建議再追貨。
麥狄文
(徐狄怡‧證監會持牌人)
