上個星期五(1月7日)揀咗隻恒指牛(68881)出嚟，不過見Slow STC(14,3)一上返去超買位就先食為敬，其後指數愈升愈有，(68881)早食好多，其實上個星期係另一處出文時都心知不妙，所以都同大家講定聲食早咗嘅話向你致歉(呢期好興，又幾好用，反正件事唔發生都發生啫，咪講句Sorry算數囉)，最後上個星期五指數喺2點左右再向上爆多次，唔駛多謝9527，多謝388(港交所(00388)啦。
呢兩日嘅新聞都離不開變種病毒Omicron，空姐阿媽去咗幾多度地方，引發出嚟嘅傳播鏈有幾多條；高官Party有幾多人入去竹篙灣隔離；源頭不明個案又係邊度受感染；大廈垂直傳播再次出現等等，第五波你話係唔係殺到埋身？
依家9點53分，恒指開市升30點，先殺23400至23499點嗰5張期指街貨之後，到依家已經完成高開低走嘅動作，喺五分鐘圖上已見指數開市回落到250分鐘線(五分鐘圖50線)後再呈上，其後更再次重上各主要平均線之上，保歷加通道口亦見拓闊，似劍指23600至23699點嗰過千張期指街貨。上個星期五隻(68881)嚴重早走兼早洩，唯有再致歉多次(做乜啫？同一個人就同一件事各大家致多次歉之嘛)。
喺聊天室上同大家講多兩講，指數已經嘭嘭聲上破埋23600點以上，即首兩層熊證街貨都死埋，而喺23600至23699點呢層有相當於過千張嘅重貨期指街貨喺度，其實咁殺法都真係凍過水。去到10點7分，恒指暫時高位見過23696點，爭4點就殺盡23600至23699點，不過，其實search返所有恒指熊證，再以收回價由小至大做排列的話，就會發現呢一層其實得番一隻死剩種，收回價係23698點，爭2點先被收回嘅熊證喺度。咁你話呢層熊證係咪殺晒？得返條骨囉。
睇返恒指日線圖，上個星期五都係電台度講過，指數其實已經重上保歷加上升通道裡面，而Slow STC(14,3)兩線繼續向超買方向出發，指數靠近返熊證街貨而又儲落唔少，都真係唔好怪恒指升到咁。
恒指牛(67002)，收回價23158點，同現價有約470點差距，約48倍槓桿即使做Dat Trade都無問題，事關日線圖上見保歷加通道口有收窄嘅情況，吼五分鐘圖Slow STC(14,3)落到超賣而出場嘅就最好啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
