噚日揀咗隻(66585)出嚟，估唔到呢頭上完文，嗰頭條Slow STC(14,3)就彈起咗，令到Slow STC(14,3)兩線都未能成功落到超賣位指數就掉頭上行，不過之後見指數喺五分鐘圖上到250分鐘線(五分鐘圖50線)之後再回，但隨咗保歷加通道收窄，喺大約2點45分至2點50點，Slow STC(14,3)兩線再次靠近超賣水平之後抽上，去到3點5分見指數出咗支比較大嘅「陽燭」抽升，有理無理啦啦聲沽走隻(66585)先，以當時(66585)高低位做過0.058元/0.054元計，平均沽貨價為0.056元，對比朝早嘅平均買入價，平均輸一格兼交易費。走貨嗰一刻可能你會覺得好唔抵，但去到完場前見到指數喺3點打後愈升愈有，特別係3點半打後，仲要倒升兼創全日Dat High，你就會覺得輸嗰一格係值得架。幾時都話風險管理(Risk managment)比賺錢(made profit)更重要。
恒指尾市嘅精彩都唔及噚日傍晚特首林鄭出嚟講嘅嘢精彩，一個Birthday Party中有百多人出席，當中包括高官，因為有一名染疫者去過，最終要去做檢測，部份人仲要送去隔離。林鄭話失望，呢個出嚟菳歉，嗰個又話汲取教訓。當全港市民諗緊呢個新年想同屋企人簡簡單單出去食餐團年飯都可以唔得嘅時候，你個百人Party教人情何以堪。
精彩嘅事件當然會一浪接一浪，仲會一次比一次更精彩(我講個市)，恒指噚日尾市抽高後，今日再升多200幾點開市，開市見23318點，呢口價先將熊證第一層街貨23200至23299點嗰266張期指全數殺清，將23300至23399點推至成為熊證第一層街貨，呢度都有相當於381張期指。至於下方牛證，今日見無新增街貨層，最貼價仍然都係22700至22799點。本身打算見噚日收市前，恒指五分鐘圖條Slow STC(14,3)上到嚴重超買位時，小注出淡倉博Slow STC(14,3)行Swing Trade回落返去超賣位，但就喺下晝3點45分左右，送貨哥哥話15分鐘後到我屋企樓下叫我收件，拿拿聲換件衫落樓再上嚟樓，望望鐘都變咗4點零幾分，喺呢度我要多謝呢位送貨哥哥，嚴重地救咗小妹一命。(90度鞠躬)
依家9點33分，恒指正式開市，暫時見到指數出現高開低走嘅情況，講真，又係技術分析 VS街貨嘅時侯，當然之前都試過呢啲情況N次，而喺呢N次之中有八成都係街貨贏
，只係依家開市無耐，指數大裂口向上衝高，開市後嘅高開低走唔難估嘅，進取嘅趁高開低走時出淡爬注格仔先啦，但安全嘅，都係順返牛熊證街貨圖嘅「意向」，吼Slow STC(14,3)落返超賣水平時，搞隻恒指牛(68881)，收回價22600點，同現價有逾470點差距，約49倍槓桿知佢咩料啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
