美股隔晚個別發展,債息抽高下,高增長股受壓,中概股亦跑輸,拖累納指下跌,而標指跟道指則再創新高。港股今日係年內最後一個結算日,半日反覆靠穩,不過欠缺北水支持下,半日成交只有368億左右,恒指亦未能企穩10天線(約23140)。
恒指高開43點,一度倒跌36點,見23050半日低位,其後反覆回升,一度升161點,見23248半日高位,但10天線未能企穩,半日升幅收窄至48點,報23134。國指升10點,報8109;恒科指噚日創成立後新低後,今日反彈,曾見5534半日高位,半日升11點,報5483。
藍籌股個別發展,京東(09618)加碼回購,半日升1.8%,跑贏ATMX,騰訊(00700)半日升0.6%;美團(03690)跟小米(01810)半日分別升0.9%及0.6%;只有阿里(09988)微跌不足0.1%,目前險守110元。至於愈撈愈低,撈極未見底嘅海底撈(06862)半日反彈2.2%,咁嘅升幅都成為表現最好藍籌,可見其他藍籌都係無乜力水。長和系向好,長實(01113)賣甩飛機租賃業務,市場對此舉投下贊成票,股價連升兩日,半日再升1.1%。
生物科技股走弱,香港上市生物科技指數半日跌0.4%;開拓藥業(09939)啱啱先話盤數較預期甩咗轆,旗下covid藥測試又未能達標,呢鋪真係屋漏兼逢連夜雨,股價噚日插水七成之後,今日早段再插水近兩成,半日跌幅略為收窄,但仍再跌13.7%,支持位盡失穿晒底,暫時真係未知見唔見咗個底,咪見跌得多就手痕入場博反彈,緊記跌得多唔係一個買貨理由。
中國恒大(03333)有消息指又有投資者收唔到債券利息,咁嘅消息都唔知傳咗幾多次,睇嚟大家都等緊恒大扯白旗投降,宣布清盤正式玩完。而奧園(03883)創52周低位,佢都係內房清盤玩完名單嘅大熱門。口痕友話內房咁搞法,睇嚟至少有十間八間最終頂唔順玩完,其實大家都係等緊有第一間內房倒下,淘汰走啲唔夠實力嘅高負債內房股,咁呢個板槐至有機會重生。
麥狄文
(徐狄怡‧證監會持牌人)