美股放完聖誕節假期繼續勇猛，標指再創收市新高，其餘兩大指數亦造好，美股連升四個交易日，可惜港股又跟唔上美股嘅步伐，其實港股已長期落後美股，人家又創新高，港股就一直low low low 。A股上證高開後轉跌，拖累港股好淡爭持，指數喺23200拉鋸，10天線(23216)希望頂得住。
恒指高開58點後，開市曾升95點，見23319半日高位，可惜A股倒跌，港股亦倒跌最多124點，見23099點半日低位，但23000有不俗支持，大市止跌回升，其後喺23200爭持。恒指半日跌14點，報23209；國指跌26點，報8175點；恒科指跌55點，報5563。雖然放完聖誕節假，但過幾日又到元旦，周五只有半日市，唔少缸邊友聖誕前收爐後，呢個星期仍然選擇唞唞，仍未歸隊，令大市成交相當淡靜。
藍籌股個別發展，大笨象(00005)跟友邦(01299)分別微升0.4%及0.2%，內銀跟內險股都有得升吓，不過成交都係偏靜。吉利(00175)跟其他汽車股都係偏弱，吉利半日跌4.8%，成為表現最差藍籌。澳門發現首宗Omicron輸入病例，濠賭股偏軟，銀娛(00027)跟金沙(01928)分別跌3%及2.2%。
科網股個別發展，雖然美團(03690)跟快手(01024) 達成互聯互通戰略合作，但兩股今日均見腳軟，半日分別跌2.2%及3.5%。內地一直要限制網遊，擔心人民過份沉迷，剛宣布未成年人元旦假期限玩，騰訊(00700)股價半日跌近3%，其他科網股普遍偏軟。
內房股今日見反彈，恒大(03333) 稱「保交樓」持續提速，股價半日彈6.1%；其他內房股亦有反彈，只係呢個板塊仍受債務問題所困擾，唔怕一萬，至怕萬一，喺內房債務危機仍未解除前，呢個板塊都係敬而遠之。
政府嘅消費券差不多到期要用完，又撞啱聖誕假期，消費大旺，唔少商場嘅生意額都顯著上升，而新地(00016)旗下15大商場聖誕假連冬至生意增三成，半日升1.4%；不過升得最多嘅地產股係恒隆(00101)，半日升4.1%，今日藍籌佢至叻。長實(01113)出售飛機租賃生意，半日升4%，反映市場對佢呢一個movement感到滿意。其他本地地產股升幅由1.1%至超過3%不等。
電力股假期前急升，今日就見回吐，不過阿Man認為係撈貨好機會，心水當然係愛股龍源電力(00916)，18元樓下買貨，博佢上返19元樓上，呢個range捉得住，短線有5%以上回報都唔錯。其他電力股之中，潤電(00836)跟中國電力(02380)都係唔錯嘅撈貨選擇。
麥狄文
(徐狄怡‧證監會持牌人)
