噚日揀咗隻恒指牛(61299)出嚟，朝早仲搵到個位落埋場，然後下半場就開始等走貨位，即係Slow STC(14,3)上返去超買水平。其實都唔駛等好耐，事關噚日大約係下晝1點45分至2點15分，五分鐘圖上嘅Slow STC(14,3)上到超買至嚴重超買水平，呢個時候就可以將隻(61299)沽走，以當時(61299)高低位做過0.049元/0.045元計，平均沽貨價為0.047元，平均賺幅為9.3%。「隻牛仔留到今日咪好囉，又升百幾點開市啦！」我都知我老媽係女人嚟嘅，不過噚日咁趕住走貨，一來按策略做Trade的話，嗰一個位置真係走貨位，之後個市向下行返落去，即果你當時無沽到，你又會呻笨同驚餐死架啦；二來，好重要，重要過我食唔食餬，就係噚日要帶我家肥貓出去睇醫生打第二支防疫針，今次換咗第二間診所，肥貓同我都表示非常滿意，多謝林念庭醫生。
今日半日市，恒指開報23375點，升182點；至依家9點39分，見指數升幅已經收窄至不足100點，高開低走嘅情況出現，無計啦，一開市時Slow STC(14,3)喺五分鐘圖上搶到咁高，好難唔回一回先嘅。聊天室裡面都見到有戰友喺出高開低走之後已經出淡倉即日搶食，大家都係為咗份聖誕禮物可以買得豪啲啫。
以今朝恒指開市價計，其實指數已經踩咗入熊證街貨範圍，而第一層熊證更率先陣亡，呢度只得29張期指，而最貼價層上移至23300至23399點，呢度都唔多貨，得百零張，比較吸睛嘅係喺23400至23499點，有成670張期指，今日會唔會衝上去食埋呢層貨先至過聖誕呢？
真心，如噚日同噚晚喺電台所講，今日一坐貨過夜，都真係唔係好似平時過weekend咁簡單，係要坐到落到下週二(12月28日)，講緊係3.5日嘅時間，又莫講話3.5日，一晚都夠你發生好多事，有咩事上嚟都真係無仇報；又加上今日得半日市，不如提早收爐，喺公司開Christmas Party好過。
今日平安佳節，希望大家往後喺輪證場上嘅日子都平平安安，無驚無險咁贏錢就最好啦！Merry Christmas！下週二再見。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
想入Patreon/聊天室？Click呢度就得：https://www.patreon.com/cbbcwar
FB：https://www.facebook.com/cbbcwar
