美股繼續彈,雖然變種病毒已喺全國各州份出現確診個案,但阿Man都話咗,大家面對疫情接近兩年,都已學會跟病毒共存,之前嗰幾日美股插水,話咗Omicron都係調整搵個藉口。美股造返好啲,港股都借勢反彈,不過彈力始終麻麻,事關魚缸無水不成事,水清無魚,但今日半日有超過600億成交額,假期前夕嚟講,都要收貨架喇。
恒指高開39點報23141,可能假期前夕,缸邊友都傾向減磅,沽壓增加下大市升勢不保,一度轉跌75點,低見23027。但二萬三邊又見買盤掃貨,大市止跌回升,一度倒升162點,高見23264,恒指半日收報23140,升37點;國企指數報8193,跌1點;科指半日跌56點,中午收5628。
科網股各自發展,騰訊(00700)宣布派發4.6億股京東(09618)作為中期特別股息,半日升4%,亦係半日升幅最大藍籌。市場對於騰訊咁做似乎幾受落,一來唔使現兜兜拎啲現金出嚟派息,可以保留作發展業務用,二來變想減持京東,有助避過阿爺話佢同京東強強聯手搞壟斷。可憐京東變相被減持,而超過4億股份更散落於騰訊小股東手中,股價半日受壓跌7.1%,藍籌之中表現最差。
不過早段京東插水一成,似乎跌過龍,阿Man就係收費聊天室,建議喺250元水平附近撈貨,半個鐘左右,股價反彈曾重返260元水平之上,眨下眼就進帳5%,呢啲即市操作,喺目前市況中都幾和味。其實長遠嚟講,騰訊跟京東隔返開少少,可以避過監管機構嘅壟斷指控,都唔係一件壞事。
至於美團(03690)半日亦跌3.5%,由於騰訊持有超過17%美團股份,唔知騰訊今次派完京東,下次會唔會派美團又變相減持,市場有戒心,梗係走先一步。其他科網股普遍下跌,只有小米(01810)升1.1%,睇嚟18元呢個重要支持位守得唔錯,下一步當然係向住20元阻力進發。
電力股今日全線走高,之前火電最威,風電落後,今日就輪到風電股跑贏,龍頭龍源電力(00916)半日升近一成,不枉阿Man坐足超過一個月死守,就係等佢上返18樓上企穩,再向住20元水平進發再挑戰高位。其他電力股係清潔能源股表現勝一籌,終於不讓火電股專美,搶返次風頭。
麥狄文
(徐狄怡‧證監會持牌人)