米字旗國出現首宗Omicron死亡個案，市場擔心Omicron疫情擴大，影響全球經濟復甦，隔晚美股下跌，加上呢個星期美國有多項重要經濟數據公布，或左右聯儲局議息決定。不過老實講，市場有晒心理準備聯儲局會加快收水，又係用返變種病毒嚟做藉口震一震個市。
不過變種病毒擴散呢個理由，股市又震一震，本來已弱嘅港股再死多兩錢重，港股噚日先高後低，恒指噚日跌咗41點後，今日沽壓更嚴重，上半場半日跌逾300點，連10天線(23839)都失守埋；恒科指半日更跌2%，6000大關又失守。
恒指低開260點，開市即穿10天線，報23693，早段跌幅曾收窄至137點，見23817點，但10天線由支持變阻力，去到條10天線又見沽壓增加，跌勢加劇，恒指最低見23631，跌咗322點。中午未見有起色，恒指半日跌301點；報23653；國指跌120點；報8431；恒科指跌118點，報5909。唯一可以呃吓自己話個市唔係咁差，係半日成交只有634億元，沽壓唔算好嚴重。
藍籌股唔使講瓜多過菜，美國10年期債息跌至近1.41厘水平，金融股捱沽，滙控(00005)跌1.7%，連跌五個交易日；友邦(01299)降1.3%，險守80元水平。騰訊(00700)忽然話審議派中期息，可惜未能吸引好息之徒，講真，派埋中期息又如何，本身騰訊嘅息就係少得可憐嘅，買騰訊係博增長，要揀收息股，未有耐輪到佢，半日跌1.2%。ATMX其他三個成員全線下跌，美團(03690)跟阿里(09988)半日跌逾1%，小米(01810)呢期最弱，半日跌3%，穿咗20元重要支持位後都未好過。消費股有資金流入，申洲(02313)半日升1.7%，成為半日最好表現藍籌股。
內房股仍受債務問題困擾，再有內房債被調低評級，內房股跟物管股跌勢顯著，阿Man多次強調呢兩個板塊，避之則吉，再有實力嘅內房股都要捱沽，主要係氣氛問題，連華潤置地(01109)呢啲央企，半日都要插水4.7%；龍湖(00960)質地算好，但半日亦要跌2.5%，其他質地差少少嘅內房股，閒閒地跌半成至一成不等。
物管股更傷，唔少物管股今日都創上市新低，其中世茂服務(00873)最傷，盤中創上市新低，半日急瀉24%、同創上市新低的融創服務(01516)與恒大物業(06666)，半日分別大跌16.9%和10.8%；創上市低還有金科服務(09666)、合景悠活(03913)、寶龍商業(09909)和時代鄰里(09928)，中午分別挫13.1%、8.6%、8%和5.5%，呢次真係排名不分先後，齊齊過堂跌餐懵，碧服(06098)半日跌8.7%，藍籌之中表現早差。
金沙中國(01928)母企拉斯維加斯金沙、美高梅中國(02282)母公司美高梅國際酒店，以及澳博(00880)，被評級機構惠譽納入「負面觀察名單」，令濠賭股雪上加霜，整個板塊風聲鶴唳，銀娛(00027)半日跌3.8%已經係跌得最少，其他濠賭股跌幅由4%至超過7%不等。
睇嚟港股呢個月都係咁款，以為上得返24000可以進一步向25000進發，話晒年結都要粉飾櫥窗，但家下利淡消息多過利好消息，睇嚟港股守到上個月低位23175都偷笑，望就望喺23500至24200之間上落住先，都咪諗有機呢個月見返25000。
麥狄文
(徐狄怡‧證監會持牌人)
