噚日喺上半場臨收市前至下半場開市無耐都有位落到隻恒指牛(57145)，但可惜喺下半場之後比較大部份時段都見到指數橫行，悶到聊天室成班人真心瞓著，還好喺下晝3點30分之後見到五分鐘圖上Slow STC(14,3)再次上返去80以上超買水平，又咁啱呢段時間就嚟收市，Slow STC(14,3)處於超買位嚟收梗係好倉不能留啦，事關第二日出swing trade落返去超賣，再加埋開市出裂口個威力，真係連我家肥貓啲罐罐都比埋個市，所以(57145)喺呢段時間都真係要走人。以呢段時間(57145)高低位做過0.052元0.048元計，平均沽貨價為0.05元，對比噚日嘅平均買入價0.047元計，爬格仔收返6.38%，隨時比埋手續費打個和。
恒指升咗三日，今日返嚟終於又見指數下行，但下行幅度暫時唔算多，始終24000點仍然守得穩，依家9點44分，指數跌101點，做緊24152點，望望今日牛熊證街貨圖，牛證方面未見有新增街貨層，最貼價仍然都係23700至23799點，不過呢個位儲咗成千張期指。至於熊證都係未見到有新增街貨層，最貼價仍然係24300至24399點，但見到貼價熊嘅街貨量比噚日係少咗，咁都好正常，退後兩步減低被打靶風險啫。而以依家恒指現價計，指數都仲係近熊證街貨層。
而喺日線圖上則見到指數暫時似乎同20天線無緣，本以為指數會再彈高多一下掂到條20天線之後，再衡量好淡雙方力量邊個強，暫時見都好似想喺10天線同20天線之間休息一下咁。
指數未見明顯方向，又再次向個股埋手，今日見隻平保(02318)都隨大市回落，不過日線圖上見股價上到100天線前作勢止步，Slow STC(14,3)兩線更處於嚴重超買至超買範圍有作勢回落嘅情況，蓋保歷加通道口未見拓闊，即係話股價再上行空間有限，股價隨時有機會跟Slow STC(14,3)出現鐘擺走勢。
平安熊(65040)，收回價63.5元，距離現價有8%差距，幾日貨仔都算安全距離，吼五分鐘圖見Slow STC(14,3)上到超買時出動，9.78倍槓桿就算係即日Day trade都夠用啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
想入Patreon/聊天室？Click呢度就得：https://www.patreon.com/cbbcwar
FB：https://www.facebook.com/cbbcwar
